DILI, 21 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) kria ona regulamentu ba utilizasaun ekipamentu agríkola ne’ebé sei distribui ba munisípiu sira, nune’e bele halo kontrolu ida di’ak ba materiál sira ne’e.
Diretór Nasionál Ortikultura, Lúcio Ramiro Ribeiro, informa katak bainhira ekipamentu agríkola hanesan tratór, hands tractor, mákina fila rai no dulas batar ne’ebé ministériu sosa ne’e distribui ona maka agrikultór sira iha munisípiu tenke uza ho responsabilidade.
“Regra ne’ebé define ona maka bainhira grupu sira iha munisípiu hetan ona ekipamentu sira, tenke uza ho didi’ak no responsabilidade, tuir duni nesesidade ne’ebé iha. Labele uza hodi halo fali buat seluk. Bainhira grupu sira laiha jestaun di’ak, ita sei dada fali materiál sira ne’e hodi entrega ba grupu seluk ne’ebé presiza”, Lúcio Robeiro dehan iha Comoro, ohin.
Nia esplika katak utilizasaun materiál sira ba fila rai ka kuda hare to’o de’it tuku 15h00, depois lori fila ona hodi fase ka hamoos, nune’e bele kontinua halo manutensaun atu labele estraga. Tanba iha ekipamentu barak maka antes ne’e ministériu fahe, maibé laiha jestaun di’ak, nune’e barak maka avaria ona.
Ekipamentu sira ne’e sei hetan kontrolu husi Diresaun Servisu Agrikultura Munisipál, inklui administradór postu sira, nune’e bele halo jestaun di’ak liu hodi asegura atu nafatin iha kondisaun seguru hodi uza ba tempu naruk.
“Ita halo hotu ona preparasaun ba distribuisaun ekipamentu tratór médiu, hands tractor, mákina behu batar, mákina fila rai ne’ebé ministériu sosa, inklui ekipamentu ne’ebé Banku Mundiál apoia ne’e hahú iha aban, maibé kansela tanba orientasaun husi ministru katak depois Papa Francisco remata nia vizita iha Timór maka foin bele halo distribuisaun”, adianta.
Tanba ne’e, nia husu ba Prezidente Autoridade Munisípiu sira atu nafatin akompaña programa distribuisaun ekipamentu, nune’e bele informa ba grupu sira atu halo mós preparasaun. Alvu husi ministériu nian mak ba munisípiu ne’ebé nia rai boot sei hetan ekipamentu hamutuk 15 no ba sira ne’ebé iha rai poténsia natoon sei hetan ekipamentu 10 no ki’ik liu lima mai kraik.
Rekorde katak Banku Mundiál disponibiliza, foin lalais ne’e, ekipamentu agríkola unidade 164 no MAPPF sosa tratór 25 atu apoia ba grupu agrikultór sira iha munisípiu atu hasa’e produsaun agríkola. Materiál sira ne’e mak tratór boot, hands tractor, mákina kuda no ko’a hare.
Notísia relevante: Primeiru-Ministru lansa distribuisaun ekipamentu agríkola ba munisípiu sira
Jornalista: Tomé Amado
Editora: Maria Auxiliadora
