DILI, 15 Juñu 2026 (TATOLI)—Selesaun Nasionál husi kontinente Ázia Japaun la hatudu nia pontu fraku ba nasaun jigante Europa Olanda, basá iha jogu primeiru grupu F Kopa Mundiál 2026 ne’e, Japaun silu-tohar Olanda nia mehi ho empata 2-2.
Jogu ne’ebé hala’o iha segunda madrugada iha Estádiu Dallas, Arlington Estadu Unidu, ne’ebé lidera husi árbitru prinsipál Elfath husi nasaun uma na’in (Amerika) ne’e, soran tebes ekipa rua nia abilidade jogu iha kampu laran. .
Olanda aprezenta kedas oportunidade osan-mean ida hodi marka golu iha inísiu jogu nian maibé la konsege, tanba iha minutu daruak, Donyell Malen lansa xutu maka’as ida ba baliza, maibé guarda-rede Japaun nian, Zion Suzuki, konsege trava bola ho salvasaun ne’ebé furak tebes.
Japaun koko atu sobu defeza olandeza ho pasajen badak no movimentu lalais, maibé iha minutu 15 dahuluk, Japaun la konsege sai ameasa sériu ba baliza olandeza.
Jogu la’o ho intensidade baibain, basá Japaun la hamosu ameasa ruma. Buat hanesan akontese ba Olanda. Dezde Malen nia tiru, olandés sira la hamosu tan ameasa ruma.
Situasaun la muda barak bainhira jogu hahú fali. Bola ne’e barak liu pasa entre ekipa rua ne’e. Laiha ekipa ida mak bele kria ameasa sériu ruma.
Jogadór Malen tenta ameasa iha minutu 33, maibé nia remata bola hetan blokeiu husi defeza japunés ida, hodi rezulta xuta kantu ida.
Tempu jogu nian neineik, no Japaun labele prodús tempu lalais ne’ebé sira depende beibeik hodi perturba defeza adversáriu nian.
Iha minutu 43, ikus mai, Japaun iha oportunidade di’ak hodi hatama golu. Keito Nakamura simu bola iha kaixa penalidade no halo xuta ida, maibé bola ne’e la’o dook husi alvu.
Minutu la’o ba oin, Japaun nia movimentu hahú sai fluidu liu. Ayase Ueda hetan pasajen ne’ebé perfeitu iha kaixa penalidade maibé suta Ueda kona ba rede li’ur.
Kampu laran sai hanesan Xaderz, jogadôr sira utiliza têkniku hodi save malu, golu la akontese to’o minutu primeira parte termina ho rezultadu hela ho 0-0.
Dolar ba segunda parte, Olanda la hatudu tan nia pontu fraku, hatudu jogu ne’ebé kualidade liu husi kapitán Virgil van Dijk iha minutu 51. Hafoin bola barullu iha liña oin Japaub, Van Dijk hala’o jogu ho matenek no fura ona rede Japaun muda rezultadu ba 1-0. Golu ba Japaun, Estádiu nakdoko ho adeptu sira-nia lian.
Maibé Japaun la fó tempu ba Olanda selebra vitória ho tempu naruk. Jogu la’o liu de’it minutu neen (6), Keito Nakamura responde ona golu ida ba Olanda iha minutu 57. Atakante ne’e simu bola kruza husi kampu klaran, Keito kontrola ho di’ak no lansa xutu tama liu rede karan rezultadu nakfilak 1-1.
Jogu sai ho rezultadu hanesan, ekipa rua tenke servisu maka’as liu iha kampu laran oinsá atu aumenta golu.
Ho nune’e, presaun Olanda fó fali rezultadu iha minutu 64. Jogadór Crysencio Summerville hatudu kualidade individuál, dribling hasoru jogadór defeza na’in-rua Japaun nian no xuta husi li’ur área penalidade bola tama liu rede laran, rezulta golu rezultadu muda ba 2-1.
Maibé mentalidade Japaun nian hatudu iha tempu ikus atu termina. Iha minutu 89, Daichi Kamada sai eroi. Jogadór meiu-kampu ne’e aproveita bola barullu iha área li’ur penalidade no lansa xutu baibain maibé bola tama liu rede Olanda nian rezultadu nakfilak ba 2-2. Golu ne’e halo lakon kedan Olanda nia esperansa ba pontu tolu (3).
Segunda parte ne’e hatudu forsa mentál ekipa rua nian. Olanda domina ho golu rua (2) husi Van Dijk no Summerville, maibé Japaun la rende no responde ho Nakamura no Kamada nia golu hodi fahe tiha pontu 1-1 iha segunda parte, rezultadu finál 2-2 reflete jogu ne’ebé ekilibradu tebes.
Ekipa Olanda (4-3-3)
Bart Verbruggen, Denzel Dumfries, Jean Paul van Hecke, Virgil van Dijk, Micky van de Ven; Ryan Gravenberch, Frenkie De Jong, Tijjani Reijnders; Crysencio Summerville, Donyell Malen, Cody Gakpo
Japaun (3-4-2-1)
Zion Suzuki, Tsuyoshi Watanabe, Shogo Taniguchi, Hiroki Ito; Ritsu Doan, Kaishu Sano, Daichi Kamada, Keito Nakamura; Takefusa Kubo, Daizen Maeda; Ayase Ueda.
Jornalista : Hortêncio Sanchez
Editór : Cancio Ximenes
