DILI, 21 agostu 2024 (TATOLI)—IX Governu Konstitusionál deside kontinua desizaun husi Governu anteriór ba dezenvolvimentu Aeroportu Internasionál Prezidente Nicolau Lobato, Comoro.
“Konkursu no dezeñu buat hotu Governu anteriór halo ona, empreza sé mak manán los hotu ona, aban hau sei iha reuniaun ho empreza ne’ebé manán no konsultór ne’e atu haree nia prosesu ba oin,” Ministru Transporte no Komunikasaun, Miguel Marques Gonçalves Manetelu, hateten iha Palásiu Governu, kuarta ne’e.
Ministru dehan, empreza ne’ebé sai manán-na’in ba projetu ne’e mak Waskita Karya husi nasaun Indonézia.
“Durante ne’e ita só diskute de’it saida mak presiza atu halo no saida mak la presiza halo,” Ministru hateten.
Antes ne’e, Governu deside ona atu avansa ho projetu reabilitasaun no estensaun pista iha Aeroporto Internacional Presidente Nicolau Lobato, ne’ebé hanesan inisiativa ida ho importánsia boot ba dezenvolvimentu infraestrutura nasionál.
Ezekutivu sira foti desizaun ne’e hafoin halo analiza ho kuidadu formatu sira ne’ebé kontrata ona ba projetu ne’e no tuir objetivu.
Notísia relevante : Governu no parseiru sei halo diskusaun revee dezeñu dezenvolvimentu Aeroportu Comoro
Projetu ne’e kompostu husi planu ba Aeroportu Comoro no kompleta nia espansaun inklui pista no asegura kondisaun sira ne’ebé presiza atu nune’e aeroportu ida-ne’e iha kapasidade hodi simu pasajeiru millaun ida kada tinan ho padraun seguransa ne’ebé a’as liu.
Espansaun pista ne’e sei hala’o iha etapa tolu, ne’ebé aeroportu sei iha kapasidade hodi simu aviaun sira ne’ebé boot liu, ho signifikativu hadi’a infraestruturas ne’ebé iha.
Etapa dahuluk, prevee atu haluan pista atuál husi metru 1.850 ba metru 2.100. Iha etapa daruak, pista sei hanaruk tan metru 400 ba tasi, hodi atinje komprimentu totál metru 2.500. Ikusliu, iha etapa datoluk, pista sei hanaruk tan metru 500 iha diresaun kontráriu, nune’e totál naruk atinje metru 3.000.
Aleinde ne’e, projetu ne’e inklui konstrusaun torre kontrolu foun ida, instalasaun sistema iluminasaun modernu ida no reabilitasaun ba terminál pasajeiru nian.
Finansiamentu ba projetu ida-ne’e hetan husi fonte oin-oin, inklui empréstimu husi Banku Dezenvolvimentu Aziátiku (ADB), apoiu finanseiru husi Governu Japaun no Austrália, nune’e mós alokasaun husi orsamentu Estadu Timor-Leste nian.
Inisiativa ida-ne’e reflete kompromisu Governu Konstitusionál IX nian hodi promove dezenvolvimentu sustentável no modernizasaun infraestrutura sira ne’ebé importante tebes iha país ne’e, ho objetivu atu hasa’e kreximentu ekonómiku no hadi’a sidadaun sira-nia kualidade moris.
Konsellu Ministru iha loron 25 janeiru 2023 delibera no fó podér tomak ba Ministru Finansa, Rui Gomes (XIII Governu) hodi reprezenta Governu Timor-Leste asina akordu kontribuisaun finanseira ho montante millaun $37,5 husi Ajénsia Kooperasaun Internasionál Japaun (JICA, sigla Inglés).
Nune’e, iha loron 09 fevereiru tinan 2023, Rui Gomes no Reprezentante JICA, Ito Mimpei, asina akordu subvensaun públika (Grant) ho montante millaun $37,5 hodi finansia konstrusaun terminál pasajeiru foun ho nia sistema abastesimentu bee-moos inklui instalasaun fasilidade apoiu no ekipamentu iha Aeroportu Internasionál Comoro.
Ho assinatura akordu subvensaun públika husi JICA, signifika katak ai-riin haat, mak finansiamentu husi ADB millaun $135, Austrália millaun $73,4, JICA millaun $37,5 no kontrapartida husi Governu ba kompontente hotu hamutuk millaun $52, kompleta ona. Nune’e bele hahú ona prosesu aprovizionamentu konkursu para atu harii Aeroportu Internasionál Prezidente Nicolau Lobato.
Husi orsamentu millaun $135 husi ADB ne’e sei uza hodi finansia projetu estensaun pista aterrajen, konstrusaun torre-kontrole tráfiku aéreu no reabilitasaun fasilidade sira seluk iha aeroportu internasionál ne’e.
Enkuantu, orsamentu millaun $73,4 husi Austrália sei uza hodi konstrui asesu estrada bá terminál pasajeiru, pakote kombate inséndiu, edifísiu kuarantena animál no planta, edifísiu ba kuidadu saúde primária, depózitu ba kombustível, eletrisidade no iluminasaun públika, fasilidade bee-moos, fatin estasionamentu karreta no motór, inklui zona drop off terminál pasajeiru iha aeroportu ne’e rasik.
Aleinde ne’e, Governu Timor-Leste aloka millaun $52 liuhosi Fundu Infraestrutura hodi finansia akizisaun rai, kompensasaun ai-horis no kustu reasentamentu ba família sira ne’ebé mak hela besik iha área aeroportu inklui obra konstrusaun sivíl sira seluk.
Jornalista : Hortencio Sanchez
Editora : Julia Chatarina
