Governu kria subsídiu ba operasaun F-FDTL no PNTL durante vizita Papa Francisco
DILI, 21 agostu 2024 (TATOLI)—Governu liuhusi reuniaun Konsellu Ministru (KM), kuarta ne’e, aprova dekretu-lei ida hodi kria subsídiu ba FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), ne’ebé sei halo seguransa másimu iha territóriu nasionál durante vizita Papa Francisco.
Dekretu-lei ne’e aprezenta husi Ministru Interiór, Francisco da Costa Guterres no Ministru Defeza, Donaciano do Rosário Gomes.
“Projetu dekretu-lei ida-ne’e ho objetivu atu kria subsídiu operasaun espesífiku ida hodi fó kompensasaun ba PNTL no militár sira husi F-FDTL ba kondisaun serbisu sira-ne’ebé espesiál durante vizita Sua Santidade Papa Francisco mai Timor-Leste, ne’ebé sei hala’o husi loron 09 to’o 11 setembru 2024,” Vise-Ministru Asuntu Parlamentár, Adérito Hugo da Costa, informa hafoin reuniaun ezekutivu, iha Palásiu Governu, kuarta ne’e.
Notísia relevante : F-FDTL no PNTL preparadu garante seguransa ba vizita Papa Francisco
Bazeia ba desizaun ne’e, kada membru F-FDTL no PNTL sei simu $10 loron ida no sira hala’o serbisu durante loron-lima.
Tuir dadus ne’ebé iha, F-FDTL no PNTL ne’ebé efetivu hodi fó seguransa durante vizita Papa Francisco hamutuk na’in-4000, nune’e totál orsamentu ne’ebé atu fó ba membru seguransa no militár hamutuk $200.000.
Jornalista : Hortencio Sanchez
Editora : Julia Chatarina
