Governu suspende voo aviaun komersiál hahú loron 09 to’o 11 setembru
DILI, 21 agostu 2024 (TATOLI)—Ministériu Transporte Komunikasaun (MTK) simu ona informasaun husi Aeroportu no Navegasaun Timor-Leste, Empreza Públika (ANATL, E.P) no Autoridade da Aviasaun Sivíl Timor-Leste (AACTL, sigla portugés) katak sei suspende voo aviaun komersiál husi rai-liur mai Timor-Leste durante loron-tolu, hahú loron 09 to’o 11 setembru 2024, iha ámbitu vizita Papa Francisco.
“Maibé bainhira Amu Papa sai ona husi ita-nia nasaun, voo sira bele la’o fali,” Ministru Transporte no Komunikasaun, Miguel Marques Gonçalves Manetelu, hateten iha Palásiu Governu, kuarta ne’e.
Dadaun ne’e aviaun ne’ebé halo operasaun husi Dili-Bali mak hanesan Aero Dili, Citilink no Qantas ligasaun husi Darwin-Dili.
“Aeroportu agora ita halo hela melloramentu, hanesan tau ona iluminasaun ba iha pista atu nune’e bele fasilita aviaun ruma emerjénsia tun kalan ita bele atende,” Ministru Manetelu, akresenta.
Notísia relevante : Reabilitasaun sala VIP iha aeroportu Nicolau Lobato besik atu konklui
Kona-ba preparasaun aeroportu ba vizita Amu Papa daudaun ne’e la’o hela hanesan reabilitasaun terminál VIP besik konklui ona. Empreza ne’ebé kaer projetu ne’e mak Dco Unipesoál, Lda.
Empreza ne’ebé sai manán-na’in ba obra ne’e garante sei finaliza iha fulan agostu ne’e nia rohan. Empreza hahú halo konstrusaun no obra reabilitasaun ne’e iha marsu no sei termina iha agostu tinan ne’e tuir kontratu ne’ebé iha.
Jornalista : Hortencio Sanchez
Editora : Julia Chatarina
