Reabilitasaun sala VIP iha aeroportu Nicolau Lobato besik atu konklui
DILI, 21 agostu 2024 (TATOLI)–Enjeñeiru Empreza Dco Unipesoál, Lda, Constantino Mendonça, hateten projetu obra reabilitasaun sala Very Important Person (VIP) no sentru klinikál hodi prepara ba vizita sua santidade Papa Francisco nian besik atu konklui, tanba atinje ona 90%.
“Reabilitasaun totál agora atinje ona 90%, hein monta tapeti ho tara odomatan. Finishing kala hela uituan de’it ona,” Enjeñeiru empreza Dco Unipesoál, Lda, Constantino Mendonça, hateten ba Agência Tatoli iha aeroportu Internasionál Prezidente Nicolau Lobato, Comoro, kuarta ne’e.
Dirijente ne’e relata empreza halo konstrusaun uma klinika foun hodi halo atendimentu ba ema moras emerjensia agora tama hotu ba iha faze finál.
“Klinika mak ne’e, monta azuleiju ho sanita iha laran ne’e haree hotu ona,” nia dehan.
Nia dehan, loloos ne’e serbisu reabilitasaun ne’e hotu ona maibé iha rekomendasaun foun hanesan serbisu ba sentru kinikál.
“Ami garante antes Papa Francisco mai vizita Timor-Leste, reabilitasaun sira-ne’e konklui ona, tanba hela odamatan no tapeti de’it. Tapeti, sei to’o iha Timor-Leste iha loron 25 agostu 2024 aban no no hein hela mak nahe tapeti ba iha sala VIP ne’e,” nia hateten.
Tuir observasaun, traballadór sira komesa fui rampa ba iha sentru klinika no sala VIP nian hodi fasilita ema ho defisiénsia (EhD) sira bele asesu.
Jornalista : Jesuína Xavier
Editór : Cancio Ximenes
