OÉ-CUSSE, 22 agostu 2024 (TATOLI) – Antigu Prezidente Autoridade Rejiaun Administrativa Espesiál Oé-Cusse Ambeno (RAEOA), Mari Alkatiri, hasai ona sasán privada hosi rezidénsia Fulolo hafoin Tribunál Primeira Instánsia Oé-Cusse (TPIO), konsidera providénsia kautelár.
Notifikasaun ne’e ba rekerente, katak iha loron 10 nia laran, tenke hasai sasán privada no hamamuk rezidénsia Fulolo.
Karta notifikasaun hosi Tribunál Judisiál Primeira Instánsia Oé-Cusse, ho NUC: 0028/24. CVTD, katak, haree ba buat hirak-ne’ebé temi tiha ona, tribunál konsidera providénsia kautelár espesífiku kona-ba reintegrasaun pose provizóriu ne’e válidu, no tuir ida-ne’e, haruka restituisaun ba rekerente nia patrimóniu, ne’ebé devidamente inventária ona.
Nune’e mós sasán pesoál hotu-hotu ba rekerente Mari Bim Amude Alkatiri, tenke permite entrega xave sira, portaun no kuartu sira husi rezidénsia, ho durasaun tempu entrega loron 10, ho kustu ba rekerente bazea ba Kódigu Prosesu Sívil (CPC, sigla portugés) artigu 659 númeru 1.
Artigu 659 númeru 1 hosi CPC ne’e hateten, kustu-sira hosi prosedimentu prekausionál-sira no kustu-sira hosi insidente hosi kualifikasaun-sira selu hosi rekerente, bainhira laiha opozisaun, maibé hetan iha asaun respetiva; sé iha opozisaun, observa artigu 653 no 654 nia dispozisaun.
Notísia relevante: FOTO ATUÁL: Sasán privada Antigu Prezidente RAEOA iha rezidénsia Fulolo hasai ona
Nune’e, iha loron-kuarta- ne’e, Mari Alkatiri akompaña husi ofisial titulár Tribunál Juridisiáriu Primeira Instansia Oé-Cusse, Dionísio Reis no Polísia Nasionál Timor-Leste (PNTL), hasai ona sasán sira-ne’ebé iha rezidénsia Fulolo.
“Ha’u atu kumpre desizaun tribunál nian, tanba iha loron 22 maiu 2024, Prezidente Autoridade ho ema lubun mai ho polísia mós mai tama iha-ne’e, sobu tiha portaun tama mai iha uma ne’e, depois halo deklarasaun ba jornalista sira, katak nia mai iha-ne’e, tanba uma ne’e halo ho osan Estadu, no rai ne’e povu nian, maibé ha’u lakohi diskute tanba ha’u koñese lei, no ha’u primeiru prezidente autoridade, ha’u koñese rai ne’e mamuk,” Mari Alkatiri ko’alia iha Rezidénsia Fulolo.
Maibé Antigu Primeiru Ministru ne’e konsidera rezidénsia Fulolo sosa ona husi Prezidente Autoridade Sesante Arsénio Paixão Bano, tanba lei fó dalan atu halo investimentu komersiál hodi rekolla reseita ba kofre Estadu.
“Ha’u lakohi diskute tanba nia kria problema, ha’u tenke keixa oin rua, ha’u keixa dahuluk iha Dili ne’e keixa krime, tanba aktu tama sobu uma ne’e krime, laiha mandadu hosi tribunál, biar iha mandadu tribunál, la’ós Prezidente Autoridade mak halo buat ne’e, maibé polísia mak halo,” nia dehan.
Keixa Daruak, uma ne’e tuir lei loloos nia (Alkatiri) tenke sosa, tanba halo ho osan estadu, Fundu Espesiál Dezenvolvimentu (FED) halo atu hatama reseita ba kofre Estadu, signifika investimentu komersiál tuir lei katak ema bele sosa
“Sei ema hotu bele sosa, ha’u de’it labele sosa tanba saida. Iha prosesu rua, prosesu krime la’o daudaun iha Ministériu Públiku, ba Tribunál iha prosesu prosedimentu kautelár, tanba sasán-sira iha uma laran ne’e, ho situasaun sira hanesan ne’e, ema bele mai foti no na’ok, entaun tribunál tenki deside atu mai foti sasán sira-ne’e molok rezolve problema prinsipál,” nia fundamenta.
“Ha’u fó parabéns ba tribunál tanba deside loloos, ne’e mak ohin ami mai atu haree sasán ruma falta buat iha uma laran maibé sasán iha uma laran kompletu, tán ne’e ha’u lakoi ko’alia barak, maibé ha’u fó fiar ba sistema justisa no fó fiar ba povu atu labele fiar ema sira-ne’ebé la hatene buat ida, maibé mai ko’alia de’it ka hatene maibé ho odiu no vingansa mai halo sasán ho sobu de’it,” nia preokupa.
Notísia relevante: Investimentu rezidénsia Fulolo hatama reseita rihun $600 bá kofre Estadu
Entretantu, iha loron 22 maiu 2024 , Prezidente Autoridade RAEOA, Rogério Tiago de Fátima Lobato, hamutuk ho membru autoridade no akompaña mós husi PNTL no serbisu terra propriedade, vizita ofisiál ba iha rezidénsia Fulolo, lokaliza iha aldei Sanane, suku Costa, sub-rejiaun Pante Makasar.
Iha ámbitu vizita ofisiál ne’e, Rogério Tiago Lobato, promete sei anula tiha dokumentu akordu kona-bá kontratu kompra venda fa’an uma estadu iha rezidénsia Fulolo, ne’ebé selebra husi eis-Prezidente Autoridade sesante Mari Alkatiri no Arsénio Paixão Bano, tanba konsidera akordu ne’e abuzu podér.
Rekorda katak iha loron 23 fulan-outubru 2017, Autoridade RAEOA prodús ona dokumentu ida kona-bá kompra no venda, katak Mari Alkatiri halo ona pagamentu ba rezidénsia Fulolo ho valór $556.889.04 iha konta bankaria tituár RAEOA-ZEEMS banku BNU Timor sukusál Oé-Cusse.
Notísia relevante: Governu Sentrál fó konfiansa ba Autoridade RAEOA kona-ba rezidénsia Fulolo
Jornalista: Abílio Elo Nini
Editór: Evaristo Soares Martins
