DILI, 22 Agostu 2024 (TATOLI) – Autoridade Protesaun Sivíl (APC, sigla portugés) husu adisionál millaun $3,9 iha orsamentu tinan oin, tanba tetu ne’ebé fó ho montante millaun $6,4 seidauk bele responde ba programa sira ne’ebé sei realiza iha tinan oin.
Diretór Nasionál Jestaun Rekursu, Virgílio Soares, hateten APC nia planu orsamentu 2025 hamutuk millaun $10,3, maibé husi tetu fiskál ne’ebé Komité Revizaun Orsamentu (KRO) fó iha de’it millaun $6,4, nune’e APC halo ona ezersísiu hodi submete filafali proposta adisionál.
Nia esplika katak husi tetu fiskál ne’ebé KRO fó ba APC ne’e ba kategoria tolu mak saláriu no vensimentu millaun $4,3, bens no servisu millaun $1,8 no transferénsia públika iha de’it $265.00.
Orsamentu adisionál ne’ebé propoin ba KRO ne’e atu finansia programa 2025 nian ne’ebé hatuur iha kategoria tolu maka bens no servisu aumenta millaun $1,7, transferénsia públika aumenta rihun $750 no iha kapitál menór millaun $1,5 atu halo akizisaun ba ekipamentu protesaun individuál ba membru bombeiru sira bainhira bá halo intervensaun ba inséndiu iha terrenu.
Diretór ne’e espera katak proposta adisionál ne’ebé submete sei hetan rezultadu pozitivu, nune’e bele aselera serbisu APC nian iha futuru, maibé proposta ne’e maka hetan redusaun duni sei fó impaktu direta ba serbisu operasionál, liuliu apoia vítima dezastre naturál sira.
“Ba tinan 2024 ne’e, ita hetan fundu transferénsia públika rihun $275, hanesan agora KRO kontinua tau iha tetu fiskál 2025 nian. Transferénsia públika ne’ebé KRO mantein ba 2025 ne’e hatudu ona iha 2024 katak foin mak ezekuta iha primeiru trimestre, orsamentu laiha ona. Ne’e tanba númeru vítima ne’ebé barak”, informa.
Tanba ne’e, APC husu ba Ministériu Finansa atu fó nafatin apoiu liuhusi fundu kontijénsia atu kontinua apoia vítima sira ne’ebé afeta ba dezastre naturál. “Ida ne’e esperiénsia ne’ebé APC hasoru iha terrenu. Ne’e duni atu labele akontese tan ba 2025, APC submete proposta adisionál ne’e hodi bele hetan apresiasaun husi KRO”.
“Ha’u garante katak orsamentu 2025 nian sei iha rezultadu di’ak, mezmu KRO la fó 100%, maibé APC sei hetan 50%. Ho nune’e, ita sei halo ezersísiu ida di’ak liu atu define área ne’ebé sai prioridade”, nia akresenta.
Lembra katak Autoridade Protesaun Sivíl nia orsamentu ba tinan ne’e hamutuk millaun $7,9 no ezekuta ona 63,4%.
Notísia relevante: APC ezekuta ona 41% husi orsamentu tinan ne’e
Jornalista: Tomé Amado
Editora: Maria Auxiliadora
