DILI, 27 Juñu 2024 (TATOLI) – Autoridade Protesaun Sivíl (APC, sigla portugés) ezekuta ona 41% ka ekivale ba millaun $2,4 husi orsamentu alokadu ba tinan ne’e hamutuk millaun $7,9.
Ezekusaun ne’e ba saláriu no vensimentu millaun $,16 husi totál $4,4, bens no servisu $365.081 husi millaun $2,4, transferénsia públika rihun $245 husi $265, kapitál menór ezekuta ona rihun $66-resin husi totál $898.625.
Diretór Nasionál Jestaun Rekursu, Virgílio Soares, haktuir katak totál ezekusaun ne’ebé haree husi pagamentu atuál iha fulan neen nia laran ne’e mak 41%, maibé kuandu inklui hotu kompromisu ho obrigasaun sa’e ona ba 59%.
Diretór ne’e informa katak orsamentu APC nian ba tinan ne’e atu realiza programa prioridade rua mak hanesan seguransa nasionál no dezenvolvimentu institusionál. Husi programa prioridade rua ne’e inklui subprograma 12 no atividade 17.
Virgílio Soares esplika katak, tuir regra ezekusaun, kada ministériu inklui instituisaun Estadu sira bainhira tama ona segundu trimestrál tenke atinje ona 50%, maibé tanba iha parte APC nian kuaze iha projetu barak maka sei iha hela prosesu konkursu públiku nia laran.
Tanba ne’e, APC garante katak ezekusaun iha terseiru trimestre ne’e sei sa’e tanba prosesu konkursu públiku tama ona iha avaliasaun no ba oin ne’e kontinua halo de’it ona pagamentu.
Relasiona ho ezekusaun orsamentál, Sekretáriu Estadu Protesaun Sivíl, Domingos Mariano Reis, husu ba nia kargu xefia sira atu serbisu ho responsabilidade hodi kumpre regra ezekusaun nian no tenke tau ida ne’e nu’udar asuntu ida importante.
Sekretáriu Estadu ne’e apela ba dirijente sira iha ámbitu diseminasaun informasaun sobre auditoria ne’ebé realiza iha edifísiu APC, horisehik.
“Diseminasaun informasaun ba asuntu auditoria ne’e importante, tanba dala barak diretór, xefe sira iha ministériu barak mak haluha tiha sira-nia kompeténsia no haluha tiha sira-nia knaar. Desizaun ne’ebé sira foti tiha, maibé sira la hatene no tetu buat ne’ebé foti ne’e di’ak ka la’e no reflete duni ba sira-nia kompeténsia ka la’e? Ikus mai, kuandu mosu problema ruma maka sira foin hakfodak ho desizaun ne’ebé sira foti ona”, nia hateten.
Ho programa divulgasaun informasaun ne’ebé halo husi Inspesaun-Jerál Estadu bele sai bukae ida ba dirijente sira iha APC atu serbisu ho kuidadu, liuliu bainhira atu foti desizaun ruma relasiona ho ezekusaun orsamentál.
Inspetór-Jerál Estadu, Francisco de Carvalho, haktuir katak atividade ida ne’e sira realiza ba kargu xefia sira tanba konsidera APC ne’e instituisaun foun, nune’e ajuda sira hodi bele serbisu ho kuidadu, bazeia ba lei no prosedimentu sira atu labele fó fali risku ba sira iha futuru.
“Dala barak superiór sira hetan akuzasaun barak liu la’ós tanba sira halo korrupsaun, maibé tanba falla husi sira-ninia lideransa rasik. Tanba la tau atensaun didi’ak ba dokumentu sira ne’ebé sira asina no ikus mai sira mak tenke simu konsekuénsia”, dehan.
Jornalista: Tomé Amado
Editora: Maria Auxiliadora
