DILI, 06 Maiu 2026 (TATOLI)—Vise-Ministru Fortalesimentu Instituisionál Saúde, José dos Reis Mango, hateten Ministériu Saúde koloka ona profisionál saúde hamutuk 200-resin ba Servisu Saúde Munisípiu no ospitál sira iha Timor-Leste.
“Kona-ba profisionál saúde sira-ne’ebé mak foin dadauk ita halo rekrutamentu hamutuk 200-resin ne’e, daudaun ne’e ita koloka hotu ona ba Servisu Saúde Munisípiu no ospitál referál sira iha Timor-Leste. Sira ita Koloka hotu ona ba munisípiu hotu-hotu no ospitál ida-idak ne’ebé iha Timor-Leste, hodi halo servisu tuir área ne’ebé mak sira hili,” José dos Reis Mango hateten ba Jornalista sira iha Hotel City8, Manleuana, ohin.
Nia relata, tuir planu Ministériu Saúde atu halo rekrutamentu ba profisionál saúde sira, maibé depende mós ba orsamentu.
“Atu halo rekrutamentu foun hein lai tanba ita haree lai ba orsamentu,” nia dehan.
Nia informa, profisionál saúde sira-ne’ebé mak foin liu iha vaga ne’e sei konsentra iha Munisípiu Dili no balun iha Hospitál Nasionál Guido Valadares hodi apoiu ba moras dengue.
“Sira iha Dili atu apoia ospitál nasionál no mós Munisípiu Dili no mós sentru saúde Vera Krús, Bekora, Formoza no Dom Aleixo. Agora iha ne’e la’ós de’it apoiu mais sira hanesan introdusaun progamatiku, tanba sira-ne’e foun entaun pelumenus sira bele hatene ona servisu. Ita halo rekrutamentu maibé sira seidauk iha koñesimentu kle’an kona-ba programa saúde sira,” nia hateten.
Antes ne’e, profisionál saúde hamutuk 200-resin apoiu hela servisu iha Ministériu Saúde, Servisu Saúde Munisípiu Dili no mós Hospitál Nasionál Guido Valadares hodi responde ba kazu dengue ne’ebé mak sa’e maka’as iha inisiu tinan 2026.
Notísia Relevante: MS seidauk koloka profisonál saúde 200-resin ba munisípiu
Jornalista : Felicidade Ximenes
Editór : Cancio Ximenes
