DILI, 22 agostu 2024 (TATOLI)–Organizasaun intergovernamentál g7+ liuhosi Adjuntu Sekretáriu Jerál, Habib Mayar, partisipa iha debate nakloke kona-ba harii dame no importánsia husi rekonsiliasaun iha Konsellu Seguransa Organizasaun Nasaun Unida (ONU).
Enkontru ne’e, hanesan enkontru prinsipál rua iha fulan-agostu bainhira Serra Leoa prezide Konsellu Seguransa ONU nian.
“Importánsia husi rekonsiliasaun nasionál mak hanesan buka lia-loos no diálogu inkluzivu sira hodi kura keixa sira no prevene konflitu iha futuru hodi sita ezemplu sira husi Timor-Leste no Serra Leoa,” Habib Mayar tenik liuhusi nota ne’ebé Agência Tatoli asesu, kinta ne’e.
Notísia relevante : Sekretáriu Jerál g7+ relata progresu serbisu ba PM Xanana
Habib Mayar subliña, apoiu internasionál tenke espesífiku ba kontestu no husu ba poténsia globál sira atu prevene funu.
Liu tan, nia husu atu respeita norma internasionál sira no haburas multilateralizmu inkluzivu.
Iha okaziaun ne’e, Mayar mós hato’o konvite ida ba Konsellu Seguransa ba retiru traballu ida hodi kompreende di’ak liután kontestu sira husi nasaun g7+ sira ne’ebé hasoru dezafiu ezistensiál sira.
Membru g7+ sira hanesan Serra Leoa (aleinde ninia papél hanesan Prezidente Konsellu nian) Timor-Leste, no Burundi mós halo deklarasaun hodi fahe sira ida-idak nia hanoin.
g7+ kompostu husi nasaun membru hamutuk 20 mak hanesan, Afeganistaun, Burundi, Xade, Komores, Kosta Marfín, Giné, Giné-Bisau, Haiti, Iemen, Illa Salomaun, Libéria, Papua Nova Giné, Repúblika Sentru-Afrikana, Repúblika Demokrátika Kongu, Saun Tomé no Prínsipe, Serra Leoa, Somália, Sudaun Súl, Timor-Leste no Togo.
Jornalista : Hortencio Sanchez
Editora : Julia Chatarina
