Komisaun C husu Governu prioriza dezenvolve setór produtivu

DILI, 22 agostu 2024 (TATOLI)-Prezidente Komisaun C trata asuntu Finansa Públika iha Parlamentu Nasionál (PN), Cedelízia Farria dos Santos, husu Governu atu fó prioridade hodi dezenvolve setór produtivu iha rai-laran.
Notísia Relevante: Relatóriu : Kresimentu ekonomia TL sei aumenta tanba investimentu governativa
Tuir relatóriu semi anuál ne’ebé husi Banku Mundiál horisehik fó sai rezultadu ne’e sai tuir hela projesaun Governu nian bainhira submete Orsamentu Jerál Estadu (OJE) 2024 nian ne’e hateten, Timot-Leste nia kresimentu ekonomia sei sa’e to’o 4,1% ka 4,3%.
“Loos duni ita-nia osan barak liu mai husi fundu petrolíferu. Hakarak ba oin kresimentu ne’e sa’e di’ak, ita tenke haree duni área produtivu sira hanesan agrikultura, turizmu no saúde mós, hanoin ita bele hadi’a liután,” nia hateten ba Agência TATOLI iha resintu PN, kinta ne’e.
Nia dehan, infraestrutura bele konsidera katak iha parte barak bainhira halo fiskalizasaun iha área rurál komesa hadi’a ona, ne’e impaktu di’ak tanba turista sira atu ba vizita fatin turizmu sira hakarak kondisaun ne’ebé mak di’ak.
“Ida ne’e mak área infraestrutura ami nota,” nia dehan
Iha área agrikultura mós iha parte barak hala’o ona maibé iha parte barak konsidera tenke hadi’a di’ak liután.
“Ne’ebé, rekomendasaun ne’e pertinente, husu Governu atu bele toma atensaun ba rekomendasaun ne’ebé Banku Mundiál fó atu dezenvolve setór produtivu,” nia hateten
Jornalista : Nelson de Sousa
Editór : Cancio Ximenes

