MSI-TL lansa programa MS Ladies iha Ospitál Referál Maliana
BOBONARO, 22 agostu 2024 (TATOLI)-Marie Stopes International iha Timor-Leste (MSI-TL), kinta ne’e lansa programa MS Ladies iha Ospitál Referál Maliana, munisípiu Bobonaro hodi halo atendimentu ba saúde seksuál no Rrprodutiva iha área planeamentu familiár.
MS Ladies nu’udar kanál ida-ne’ebé enolve direitamente ba komunidade liuhosi atendimentu servisu no edukasaun ba fasilidade Governu ne’ebé identifikadu hanesan Sentru Saúde Komunitária, Ospitál Referál no Ospitál Nasionál liuhosi utilizasaun fasilidade governu nian.
Diretora MSI-TL, Maria Amelia Barreto, esplika programa ne’e lansa tanba hetan suporta husi Governu Austrália ne’ebé kolabora ho Ministériu Saúde atu fó atendimentu kuidadu saúde sekundáriu kada loron tuir oráriu iha Ospitál Referál Maliana.
Notísia relevante: Governu-Marie Stopes lansa programa ekipa baze “Outreach” iha Covalima
“Durante ne’e kanál ne’ebé servisu iha munisípiu Bobonaro ne’ebé Outrich de’it, signifika mai iha loron indikadu de’it, membru ka ekipa ne’e mai wainhira nesesita, agora aumenta tán kanál MS Leadis ninia modelu operasaun ne’e servisu iha fasilidade dedikadu, hanesan agora iha Ospitál Referál Maliana, hahú husi segunda to’o sesta,” nia katak.
Nune’e fó atendimentu ne’ebé di’ak liután, signifika hirak-ne’ebé mak mai partu no moras, ba hirak-ne’ebé hela besik karik hakarak hetan atendimentu saúde seksuál reprodutiva no planeamentu familiár bele ona iha Ospitál.
Nia agradese ba Ministériu saúde liuhosi Ospitál Referál Maliana ne’ebé bele oferese fatin ba ekipa MS Leadis hodi halo serbisu.
“Ami espera ekipa ne’ebé dedikadu iha Ospitál Referál Maliana sei fó atendimentu ba kliente sira, presiza informasaun de’it sira bele mai, presiza atendimentu mós bele mai,nwainhira mai direitamente hetan atendimentu, sei hetan akonselamentu nune’e bele hatene tipu métodu planeamentu familiár mak kliente ne’e elijivél ba no tuir ninia nesesidade,” nia katak.
Reprezentante Diretora Jerál Servisu Ospitalár hosi Ministériu Saúde, Delfim Ferreira, konsidera programa ne’e sei konstrui ba misaun ida asegura saúde no bein-estar kada individu liuhosi atendimentu ne’ebé kompreensivu.
“Agradese ba MSI-TL ne’ebé serbisu tomak hodi apoia Governu no estadu Timor-Leste iha área saúde seksuál reprodutiva hodi asegura informasaun ne’ebé mak loos, atualizadu no atendimentu ne’ebé presiza atu asegura komunidade iha munisípiu Bobonaro,” nia hateten.
Prezidente Autoridade Munisípiu Bobonaro, Alexandrino Pires, agradese ba MSI-TL no konsidera programa ne’e bele apoia no mellora diak liután servisu iha Osipitál Maliana hodi fó atendimentu no advokasia ba komunidade no família sira atu moris ho saudável liután.
Biban ne’e, Diretór Ezekutivu Ospitál Referál Maliana, José da Cruz, konsidera programa ne’e bele melora di’ak liután atendimentu ba kliente sira ne’ebé atu hetan atendimentu no advokasia ba saúde seksuál reprodutiva no planeamentu familiár.
Ezekutivu ne’e orgulu tanba MSI-TL sei apoia rekursu umanu, transporte ba outrich no fasilitasaun treinamentu ba pesoál saúde sira iha Ospitál Referál Maliana.
“Ami iha-ne’e bainbain atu ba baze, difikuldade ba transporte, entaun Marie Stopes mai iha ne’e ami agradese bele lori ami ba área rurál tanba ita-nia inan-aman sira iha área rurál importante atu hetan asisténsia saúde,” nia akresenta.
Enkuantu lansamentu ne’e nu’udar faze daruak ne’ebé faze dahuluk hala’o ona iha Ospitál Referál Covalima iha 15 jullu 2024.
Notísia relevante: MSITL fasilita formasaun bá pesoál saúde Bobonaro
Jornalista: Sérgio da Cruz
Editór: Evaristo Soares Martins
