OÉ-CUSSE, 22 Agostu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Lobato, selebra kontratu ho Organizaun Naun-Governamentál (ONG) 12 no grupu relijioza haat no feto potensiál ida hodi atribui fundu subvensaun públika rihun $351 atu halo advokasia ba prosesu dezenvolvimentu iha Oé-Cusse.
Koordenadora ba Sosiedade Sivíl iha Gabinete Prezidente Autoridade RAEOA, Merita Marques, informa katak intensaun husi asinatura akordu ne’e atu halo parseria ho ONG sira iha Oé-Cusse atu halo advokásia nafatin kona-ba atividade no dezenvolvimentu iha RAEOA, liuliu iha área rurál.
“Durante ne’e ita serbisu hamutuk ho ONG sira, maibé ita foku liu ba atividade seluk. Ohin, ita haree liu ba área rurál no mós ba rádiu komunidade Atoni Lifau atu hatutan nafatin lian ne’ebé durante ne’e ita seidauk foka sai”, Merita Marques hateten.
Nia husu ba ONG sira atu uza osan ne’e ho responsabilidade, tuir atividade ne’ebé planeia ona, tanba sei halo avalisaun atu hatene sira-nia dezafiu no progresu serbisu.
“Kada fulan tolu [grupu] sira submete relatóriu. Ekipa ne’ebé ami forma ona sei bá vizita kada ONG sira atu haree sira-nia atividade iha terrenu, iha mudansa ka la’e? Tanba ne’e osan Estadu, tenke ezekuta ho responsabilidade”, nia dehan.
Diretór-Ezekutivu ONG A-LAO, Firmindo Joanico Caunan, agradese tanba liuhusi fundu ne’e bele hakbiit ONG sira atu realiza atividade ba populasaun sira.
“Ha’u kontente tanba ami bele halo parseria ho autoridade RAEOA, liuhusi fundu ki’ik ne’e mós espera katak tinan oin mós bele kontinua hodi envolve ami sosiedade sivíl halo atividade idaidak nian, hanesan A-LAO oinsá bele promove inan-feto sira ba programa saúde nian, foka liu ba problema má-nutrisaun iha RAEOA”, nia salienta.
Grupu benefisiáriu sira ne’e mak Asosiasaun Haburas Kapasidade Agrikultura no Ekonomia (AHCAE), Programa Monitorizasaun Sistema Justisa (JSMP), Asosiasaun Lifau Wee Suku (A-LWS), Fundasaun Salu Mata, Alfela, Rádio Komunidade Atoni Lifau (RCAL), Uma Pás Oé-Cusse (UPO), Haburas Dezenvolve Talentu (HADEZTA), Asosiasaun Feto Mudansa Ekonomia Família (AFMEF) no Asosiasaun Leno Atoni Oé-Cusse (A-LAO).
Nune’e mós Sentru Educação Sívika Enklave Oé-Cusse (CECEO), Fundasaun Esperansa Enklave Oé-Cusse (FEEO), Asosiasaun Amafot Justisa Enklave Oé-Cusse Ambeno (AAJEOA), Dapur Povu, Maubere Racing Motor Team, Kapela Oébau, Kapela Nijamuti, Kapela Haubone no Kapela Oél-Abis iha suku Usitaco.
Notísia relevante: SEFOPE apoia rihun $11 ba grupu auto-empregu tolu iha Oé-Cusse
Jornalista: Abílio Elo Nini
Editora: Maria Auxiliadora
