DILI, 22 agostu 2024 (TATOLI)–Prezidente Asosiasaun Arte Moris, Iliwato Dana Bere, hateten grupu artezenatu timoroan pinta parede iha Katedrál, Rezidénsia madre ALMA no iha Faról-Dili, hanesan asaun ida atu simu Papa Francisco ne’ebé sei hala’o vizita Estadu no pastorál iha Timor-Leste, iha 09-11 setembru 2024.
Fatin ne’ebé grupu artezenaku sira pinta mak hanesan parede Ka moru Aerportu Internasionál Nicolau Lobato Dili, ponte CPLP, rezidénsia Madre Asosiasi Lembaga Misionari Awam (ALMA), moru iha Farol, kaza Europa no Caritas Katedrál Dili nian.
Responsável ne’e hateten, komisaun organizadora husi Governu nian mak hili dezenu ba grupu artezenatu timoroan iha Dili hodi pinta parede ka moru iha fatin sira-ne’ebé Governu identifika tiha ona.
“Imajen ne’ebé pinta iha parede ka moru lolon mak hanesan Tais Timor, imajen amu Papa Francisco nian no uma adat Timor-Leste nian. Komissun Organizadora Governu nian liuhusi Sekretariadu Arte no Kultura mak dirije imajen ba ami mak pinta,” Prezidente Asosiasaun Arte Moris, Iliwato Dana Bere, hateten ba Agência Tatoli liuhusi Telefónika, kinta ne’e.
Nia dehan, fatin sira-ne’ebé grupu artezenatu pinta ne’e Governu selu metade no sira mós kontribui voluntariamente.
“Sorin baluk ami kontribui no Governu selu sorin. Valor mínimu ba pintura sira iha fatin ne’e mak $1.080 no valor másimu liu $3000,” nia dehan.
Iha mós artezanatu individu sira-ne’ebé halo pintura mós iha Palásiu Prezidentsiál Nicolau Lobato, Bairru Pite mak grupu Kakuluk Lahuk no pintór individu sira pinta kona-ba istória igreja Fortigoon ne’ebé pinta husi pintór Arte Moris.
Grupu artezenatu sira kompostu husi Asosiasaun Arte Moris, Gembel Art Colective, Brother Art, Tokodede Art, Arte Uma Lalatak no Fini Art.
Jornalista : Jesuína Xavier
Editór : Cancio Ximenes
