DILI, 23 agostu 2024 (TATOLI)—Arsebispu Arkidioseze Metropolitana Dili, Dom Virgílio Kardeál do Carmo da Silva, konsidera selebrasaun loron Konsulta Populár ba dala-25 iha 30 agostu nu’udar momentu ida atu bolu ema hotu nia afirmasaun ba espíritu nasionalizmu no patriotizmu.
“Ita sente orgullu, maibé ida mak ne’e, Konsulta Popular bolu ita atu afirma ita-nia identidade nu’udar timoroan, ba iha ita-nia patriotizmu no nasionalizmu oinsá mak kontribui atu hametin nafatin ita-nia nasaun ba dezenvolvimentu, Parabéns ba timoroan hotu ne’ebé selebra dala-ida tan loron Konsulta Populár ba dala-25 iha 30 agostu. Ida-ne’e importante tebes,” Arsebispu hateten iha Tasi-tolu, sesta ne’e.
Nia dehan, vizita Amu Papa (09 to’o 11 setembru) no Konsulta Populár hanesan buat rua ne’ebé la’o hamutuk.
“Iha momentu Papa João Paulo II mai Timor (1989), sé mak koñese Timor, ema la hatene Timor iha ne’ebé, tanba iha los provínsia Indonézia nian no iha kontinente boot Austrália nia oin,” nia akresenta.
Notísia relevante : PM husu foin-sa’e promove dame no prepara-an simu mensajen Papa Francisco
Kardeál deskreve, momentu ne’ebá ema hotu la hatene Timor maibé Papa João Paulo II mai iha Timor tanba katólika no mai iha momentu difísil nia laran hodi hato’o mensajen esperansa ba povu timoroan ‘imi hamriik metin iha imi-nia fiar sai naroman no masin ba mundu.
Tanba ne’e, Kardeál husu ba ema hotu atu aproveita momentu sira ne’e hotu sai momentu grasa nian, selebra Konsulta Populár ho agradese ba Maromak no prepara-an ba vizita Amu Papa ninian.
“Ida-ne’e mai ho sentidu agradesimentu, liuhusi Konsulta Populár ne’e hamriik nu’udar rai ida no povu ida ho nia soberania rasik iha rai kiik-oan ida nia leten,” nia tenik.
Dom Virgílio reforsa, agora iha ambiente preprasaun ida diferente ba vizita Amu Papa Francsico mai Timor-Leste.
“Saida mak ha’u halo atubele partisipa iha ambiente ida-ne’e. Vizita Amu Papa nian la’ós mai beibeik, momentu istóriku ba rai ida-ne’e ninian, ita hotu lalika husik hela, fó hanoin sei iha loron 16, seidauk tarde ba ita no sarani hotu bele aproveita oportunidade ida-ne’e, tanba Amu Papa nia vizita ne’e la’ós grasa de’it, maibé prezensa em si grasa ba ita. Uma-kreda fó grasa ba povu, aproveita momentu ida-ne’e hodi selebra ita-nia fiar, unidade no komuñaun nu’udar sarani,” Kardeál hato’o.
Nia hameno, bainhira sarani sira iha difukuldade ba transporte husi foho mai Dili, bele rejista-an iha Parókia sira iha Dili hodi hamutuk família iha Dili tuun antes hodi bele hasoru Amu Papa.
Nune’e, Arsebispu enkoraja ema hotu atu hakat mai no hakman-an ba misa solene iha Tasi-tolu, ne’ebé daudaun ne’e sai momentu ida hodi marka istória boot ba Timor-Leste.
Jornalista : Jesuína Xavier
Editora : Julia Chatarina
