DILI, 23 agostu 2024 (TATOLI)—Primeiru-Ministru (PM), Kay Rala Xanana Gusmão, husu ba foin-sa’e timoroan atu promove dame no prepara-an simu vizita partorál Amu Papa Francisco iha loron 09 to’o 11 setembru.
“Santu Padre sei mai hanorin ita dame, laiha violénsia no hadomi malu, tanba ita akompaña jornada mundiál juventude iha Lisboa Portugal, Nia husu mak ida-ne’e. Ne’e duni, ita prepara-an, hanesan Kardeál dehan tiha ona, prepara-an atu simu Nia mensajen no liafuan. Hadomi Malu no ajuda malu ba,” Xefe Governu hato’o iha ámbitu inugurasaun no bensaun Santu Altár ba misa solene iha loron 10 setembru, ne’ebé sei prezide husi Amu Papa, iha Tasi-tolu, sesta ne’e.
PM dehan, vizita istóriku ne’e nu’udar vizita daruak Santu Padre tanba bainhira João Paulo II mai halo vizita dahuluk mai Timor-Leste iha tinan 1989, momentu ne’ebá iha tempu difísil hodi enkoraja timoroan, maibé vizita agora ne’e atu husu timoroan tomak prepara mentalidade hodi rona Amu Papa.
“Fatin ne’e kiik, ema barak sei mai husi munisípiu hotu. Ita husu barak ba Maromak labele akontese buat ida, atu vizita mai la’o di’ak no sai ita-nia istória. Agradese ba imi-nia prezensa,” PM tenik.
Notísia relevante : Dalan protokolu husi Aeroportu Comoro to’o Katedrál sei taka durante vizita Papa Francisco
Biban ne’e, Xefe Governu apela ba abitante iha Tasi-tolu besik Altár, atu kuidadu ho fatin ne’e.
“Husu ba maluk sira iha bairru sorin-sorin ne’e atu kuidadu, labele ba kesi bibi, fahi karau no kuda atu labele estraga fatin sagradu,” nia fó hanoin.
Iha fatin hanesan, Ministru Administrasaun Estatál, Tomás do Rosário Cabral, hateten, parte ekipa responsável sei tau-matan ba fatin ne’ebé prepara ba misa solene.
“Iha ne’e mos seguransa sira sei tau-matan nafatin, tanba sasán barak komesa mobiliza mai iha ne’e. Atu hato’o ba ita hotu, hahú aban foku serbisu iha ne’e, tanba delegasaun atu mai halo inspesaun. Aban sei to’o mai no loron 27 agora sira hatama relatóriu,” nia katak.
Nune’e mos, iha loron 01 setembru delegasaun Vatikanu sei mai nafatin preparasaun simu vizita sira, molok Amu Papa to’o iha Dili.
Kardeál agradese ba Governu nia esforsu
Iha biban hanesan, Arsebispu Arkidioseze Metropolitana Dili, Dom Virgílio Kardeál do Carmo da Silva, apresia ba parte hotu nia kontribuisaun.
“Uluk nanain ita agradese ba Maromak, ohin ita bele halibur hamutuk iha lorokraik ida-ne’e, iha fatin furak ida-ne’e hodi fó bensaun no inaugura Altar Santu no presbiteru tomak hodi prepara ba selebrasaun Eukaristia ne’ebé Sua santidade sei prezide iha loron 10 setembru mai,” nia hateten.
Kardeál agredese ba parte hotu nia esforsu hodi konkretiza preparasaun ba vizitasaun ne’e.
“Hodi uma kreda nia naran, hakarak agradese ba Governu ne’ebé xefia husi Primeiru-Ministru ho laran luak prepara fatin ida-ne’e furak tebes ba sarani hotu. Fatin ida-ne’e la’ós furak de’it, maibé sai fatin Santu ne’ebé ita sei hasoru malu ho Santu Padre. Ne’e duni Amu Papa nia vizita ne’e sai grasa ida ba sarani timoroan, tanba ne’e fatin furak ba ita hotu,” Arkidioseze Metropolitana Dili, hato’o.
Nia hatutan: “Ita agradese ba ema hotu ne’ebé serbisu, liu-liu ba empreza no Ajénsia Dezenvolvimentu Nasionál ne’ebé serbisu maka’as hodi transforma fatin Tasi-tolu sai fatin furak ba ita hotu, ita reza atu Na’i Maromak rekompensa sira-nia sakrifísiu ne’ebé sira halo hodi nakfilak fatin sai fatin furak ba ita hotu.”
Kardeál husu ba ema hotu atu prepara isin no klamar ba momentu istóriku ida iha rai doben Timor-Leste.
Nune’e mós, Reprezentante Vatikanu iha Timor-Leste, Monseñor Marco Sprizzi, konsidera, ohin hanesan loron ksolok ba ema hotu hodi inaugura Altár ida-ne’e, bainhira komesa harii hanesan mehi ida.
“Laiha bu’at ida iha ne’e, iha parte tuan de’it, agora parte foun. Ida-ne’e kontinuidade entre istória João Pauo II ne’ebé mai Timor-Leste. Agora Amu Papa Francisco mai konfirma Timor-Leste nasaun livre no independete no konfirma iha fiar,” Monseñor Marco Sprizzi, hato’o ba jornalista sira.
Nia apresia Governu nia esforsu: “Entaun, Santa Sé hodi Papa nia naran ita agradese ba Governu ba serbisu ne’ebé halo ona. Maibé agora buat ida importante liu mak sarani sira ba enkontru ho Papa komprementa no simu bensaun no grasa husi Papa. Ida-ne’e kontrui atu povu bele partisipa iha Santa misa.”
Monseñor nota katak, iha sarani barak mak rejista ona atu partisipa mosa solene nune’e nia husu husu sarani ne’ebé seidauk rejista atubele inklui.
“Enkoraja sira seluk atu rejista-an atubele asesu livre no hakmatek. Maibé sira ne’ebé la rejista mós posibilidade bele asesu livre no iha espasu. Laiha ema ida atu haruka fila, tanba laiha naran rejistu iha lista. Papa hakarak povu livre partisipa iha Santa misa,” nia tenik.
Serimónia bensaun Altár ne’e partisipa husi sarani, membru Governu, parte igreja inklui entidade relevante sira.
Jornalista : Jesuína Xavier
Editora : Julia Chatarina
