Dalan protokolu husi Aeroportu Comoro to’o Katedrál sei taka durante vizita Papa Francisco
DILI, 23 agostu 2024 (TATOLI)—Dalan protokulu ne’ebé Papa Francisco liu sei taka ba movimentu transporte públiku, hahú loron 09 to’o 11 setembru.
Vise-Koordenadór ba vizita Papa Francisco no atuál Pároku Motael, Padre Guilhermino da Silva, hateten, dalan protokulu ne’ebé taka ba movimentu transporte públiku mak hanesan husi Aeroportu Internasionál Prezidente Nicolau Lobato, Comoro, Dirasaun Pantai kelapa bá Rezidénsia Asosiasi Lembaga Misionari Awam (ALMA) no Motael bá Igreja Katedrál iha Vila-Verde.
“Buat seguransa ne’e muda bá-mai, maibé sira husi dalan klaran husi Rotunda Nicolau Lobato mai to’o Palásiu Prezidensiál, depois mai liu Motael,” Padre Guilhermino da Silva, informa iha sede Konferénsia Episkopál Timorense, Bidau-Lecidere, sesta ne’e.
Notísia relevante : F-FDTL no PNTL preparadu garante seguransa ba vizita Papa Francisco
Saserdote ne’e dehan, Amu Papa sei bá vizita ALMA iha loron daruak, molok bá iha Katedrál, entaun sei taka dirasaun ne’ebá nomós iha Sentru Konvensaun Dili (CCD, sigla portugés).
“Iha loron ikus nian Papa sai husi Nunsiatura iha Farol sei liuhusi Palásiu Governu nian, bá Sentru Konvensaun Dili no fila mós hanesan,” nia akresenta.
Biban ne’e, Padre ne’e konfirma katak durante vizita Pastorál ne’e, sei la taka dalan iha fatin hotu, maibé fatin balun de’it ne’ebé Amu Papa liu.
“Konserteza movimentu paradu iha dalan protokulu, maibé área sira seluk no dalan sira, movimentu sei la’o normál. Maibé Polísia dehan labele liu dalan ne’e, ita labele liu. Dalan kiik-oan sira ne’ebé Santu Padre la liu iha ne’ebá, ema hotu bele la’o ka halo movimentu,” nia tenik.
Jornalista : Jesuína Xavier
Editora : Julia Chatarina
