DILI, 23 agostu 2024 (TATOLI)—Prezidente Parlamentu Joven, Wilson Josue Amaral, rekomenda ba Governu atu prioriza investimentu teknolójia iha setór edukasaun.
Notísia Relevante: PPN husu estudante sira kontinua aprende hodi aumenta esperiénsia
Nia dehan, bazea ba programa Parlamentu joven ba tinan ne’e ho tema “Os Jovens e as Tecnologias de Informação e Comunicação”, mak durante diskusaun hamosu projetu no rekomendasaun hodi husu ba Governu no Parlamentu Nasionál atu bele konsidera.
“Ba dahuluk, presiza investimentu bazeia ba tema ne’ebé iha, presiza halo investimentu liuhusi Ajénsia Téknolójia no Informasaun (TIC) ho presiza investimentu empreza telekomunikasaun hodi bele lori ekipamentu telekomunikasaun ba área rurál hodi dezemvolve edukasaun bazeia ba teknolójia, tanba ema hotu iha sékulu XXI presiza adapta ho teknolójia modernu liuliu iha setór edukasaun,” Nia hateten ba jornalista sira iha sala plenária Parlamentu Nasionál, sesta ne’e.
Aleinde ne’e, nia rekomenda ba Parlamentu Nasionál atu kria lei hodi regula tanba joven ohin loron lakon tempu barak liu iha teknolójia maibé haluha tiha ba futuru.
“Entaun, presiza haree iha setór edukasaun halo investimentu ba edukasaun no koopera ho empreza telekomunikasaun,” nia dehan.
Deputada Parlamentu Joven, Daniela Maria Dias Ximenes, hateten durante diskusaun iha komisaun na tema ne’ebé iha tanba ita hotu hatene mundu ida agora teknolójia avansadu tebes ne’ebé iha vantajen no desvantajen ba teknolójia,
“Iha ne’e- ami-nia projetu husu ba Parlamentu atu kria programa hodi apoiu joven sira uza teknolójia no fasilita komputadór no sasán ne’ebé iha atu eskola presiza,” nia hateten.
Aleinde ne’e, nia dehan, iha projetu ne’ebé diskute mós liga ba tema ne’ebé iha, husu Parlamentu Nasionál atu kria lei ida-ne’ebé iha vantajen atu ami joven sira uza teknolójia ho di’ak.
Jornalista : Nelson de Sousa
Editór : Cancio Ximenes
