PPN husu estudante sira kontinua aprende hodi aumenta esperiénsia
DILI, 23 agostu 2024 (TATOLI)—Reprezentante Prezidente Parlamentu Nasionál (PPN) no atuál Xefe bankada KHUNTO, António Verdiál de Sousa, halo aberturra ba plenária Parlamentu Joven husu estudante sira atu kontinua aprende hodi bele aumenta koñesimentu no esperiénsia.
Notísia Relevante: Programa Parlamentu Joven lori estudante hatene funsaun Deputadu nian
“Onra boot mai ha’u ne’ebé hetan orden husi PPN, Maria Fernanda Lay hodi reprezenta Prezidente hodi halo abertura ba sesaun plenária iha Parlamentu Nasionál ba joven Parlamentu sira. Nu’udar Deputadu lia menon ba oan sira liuliu joven Parlamentu ne’e atu bele aprende saida mak imi hatene no prátika iha loron hirak nia laran. Mezmu tempu badak maibé nafatin aprende, aprende no aprende, nune’e bele aumenta imi-nia vida estudante ho esperiénsia iha área oioin,” Nia hato’o bainhira halo abertura ba sesaun plenária Parlamentu Joven iha sala plenária PN, sesta ne’e.
Tanba, nia dehan, nasaun ne’e nia futuru iha joven sira-nia liman, nune’e presiza prepara joven karik bainhira sira sai fali Deputadu mak sira iha tiha ona matéria tanba antes ne’e hetan ona koñesimentu.
Nune’e, nia husu atu estudante sira kontinua estuda makaas hodi prepara qan tanba joven mak futuru nasaun nian.
“Ha’u fiar, ita-nia joven timoroan sira-ne’e matenek tebe-tebes,” nia louva.
Nu’udar membru husi órgaun lejislativu apresia tebes programa refere ne’ebé realiza tanba serbisu hamutuk husi United Nation Development Programe (UNDP), Governu liuhusi Ministériu Edukasaun (ME) ho Parlamentu Nasionál.
Tanba ne’e, nia husu ba Governu, parseiru UNDP no PN rasik atu kontinua programa refere iha tempu oin mai.
Deputada Parlamentu Joven no hanesan mós reprezentante estudante husi eskola sekundária Esternatu São José, Daniela Maria Dias Ximenes, sente orgullu tuir atividade ne’e hodi hetan esperiiénsia hodi bele aprende sai mateira ida iha futuru.
“Durante loron hirak ami iha Parlamentu aprende buat barak hodi hatene papél Parlamentu atu halo lei no seluk tan,” nia dehan.
Deputadu Parlamentu Joven, Wilson Josue Amaral, dehan ida -ne’e oportunidade di’ak nu’udar estudante sekundáriu husi Esternatu São José hetan fiar hodi partisipa iha programa ne’e hodi hatene liután papél Parlamentu Nasionál halo lei no prosesu elaborasaun lei, fiskalizasaun no halo desizaun polítika.
Tuir rezolusaun PN númeru 6/2019 estabelese programa Parlamentu joven, nune’e PN organiza ona edisaun dahuluk no daruak Parlamentu joven ne’ebé programa refere dirije ba joven sira ho objetivu atu promove partisipasaun ativa joven sira-nian iha komunidade nia leet no insentiva sira-nia kontribuisaun solusaun ba kestaun sira ne’ebé afeta ba interese komún.
Parlamentu joven ne’e programa ida-ne’ebé dirije ba estudante sira liuliu iha ensinu sekundáriu jerál no tékniku vokasionál sira, inisiativa ne’e konta ho partisipasaun ho estudante sira husi kapitál Dili no munisípiu sira ho kolaborasaun husi Ministéiru Edukasaun.
Ba tinan ne’e, Parlamentu joven partisipa husi estudante sekundáriu na’in-42 husi eskola sira iha munisípiu Dili.
Programa Parlamentu joven ba tinan ne’e ho tema “Os Jovens e as Tecnologias de Informação e Comunicação”.
Atividade ne’e, hala’o durante loron rua 22-23 agostu no iha loron dahuluk Deputadu Parlamentu joven sira diskute ba tema ne’ebé mak iha ba iha komisaun tolu diferensa no kada komisaun diskute projetu haat ka lima no kada komisaun sei aprova de’it projetu rekomendasaun ida ho medida to’o lima hodi aprezenta iha plenária.
Ba loron daruak, iha plenária sei diskute medida sira ba projetu rekomendasaun finál no sei iha votasaun finál só aprova de’it projetu rekomendasaun ida ho medida 10 ne’ebé di’ak-liu hodi aprezenta ba Prezidente Parlamentu Nasionál.
Jornalista : Nelson de Sousa
Editór : Cancio Ximenes
