PM Xanana agradese OMS ba apoiu saúde iha Timor-Leste
DILI, 23 agostu 2024 (TATOLI)–Primeiru-Ministru (PM), Kay Rala Xanana Gusmão, agradese ba Organizasaun Mundiál Saúde (OMS) ne’ebé fó apoiu másimu ba setór saúde iha Timor-Leste.
“Primeiru-Ministru agradese tebes ba OMS ne’ebé halo kontribuisaun barak liuhusi ninia reprezentante iha Timor-Letse no iha tempu badak OMS sei fó apoiu bá oxijéniu ne’ebé sei lansa iha Hospital Nasionál Guido Valadares (HNGV),” Ministra Saúde, Elia Amaral, informa iha Palásiu Governu, sesta ne’e.
Diretora OMS ba Rejiaun Sudeste Aziátiku, Saima Wazed, ne’ebé foin hetan nomeasaun iha loron 01 novembru 2023, hasoru-malu ho PM Xanana hodi atualiza ninia roteiru ka planu hakarak atu kontinua lori saúde ba inan-feton sira nomós ema vulnerável sira iha rejiaun ne’e.
“Nia foin hetan nomeasaun hanesan diretora rejionál no mai ho ninia roteiru rasik, prinsipál liu oinsá atu lori saúde ba inan-feton sira, labarik feto, adolesente inklui populasaun vulnerável sira,” Ministra akresenta.
Notísia relevante : MS-OMS lansa Sentru Nasionál Gripe
Reprezentante OMS rejionál ne’e iha planu kona-ba saúde eskolár no sei vizita hamutuk eskola hamutuk 300-resin iha Timor laran tomak iha tinan ne’e no tinan oin.
Iha ámbitu ne’e Ministra Elia relata katak, sei asina akordu ho Ministériu Edukasaun (ME) atu hadi’a di’ak liután prestasaun ba programa saúde eskolár.
“Memorandu entendimentu ne’ebé Ministériu Saúde no Ministériu Edukasaun iha mak atu hadi’a di’ak liután saúde eskolár, liu-liu ba ita-nia jerasaun foun sira tuir mai,” Ministra tenik.
Jornalista : Hortencio Sanchez
Editora : Julia Chatarina
