DILI, 24 Agostu 2024 (TATOLI) – Timor-Leste selebra, iha 30 Agostu 2024, tinan 25 Konsulta Populár 1999. Data istórika ida-ne’e, marka momentu desizivu ida ne’ebé fundamentál iha istória Timor-Leste nian.
Relasiona ho komemorasaun loron ne’e, Núnsiu Apostóliku Vatikanu iha Timor-Leste, Monseñór Marco Sprizzi, hateten Konsulta Populár ida ne’e sai loron ida ne’ebé timoroan hotu deside nia autodeterminasaun ba ukun rasik-aan iha 1999.
“Ida ne’e ba desizaun livre povu timoroan ne’ebé hili nia futuru, nia liberdade, nia independénsia hanesan nasaun iha ne’ebé ho nia identidade fiar nian”, Marco Sprizzi dehan iha Tasi Tolu.
Monseñór salienta katak tema ba vizita Papa Francisco nian “Atu imi-nia fiar sai imi-nia kultura” ida ne’e hili, tanba mós aniversáriu loron Konsulta Populár ida ne’e.
Nia hatutan katak fiar fó identidade ba povu no nasaun no autonomia independénsia timoroan nian. Tanba ne’e, aniversariu Konsulta Populár ida ne’e la’ós atu selebra de’it, maibé atu simu mós vizita pastorál Santu Padre nian ne’ebé sei mai iha loron 09 to’o 11 Setembru.
“Vizita ida ne’e atu povu Timór bele sente forsa, enerjia, talentu no entuziazmu atu la’o bá oin atu ajuda ema hotu, sosiedade ida ne’ebé justu liu no ba sira ne’ebé presiza liu hanesan ema moras no ema fraka atu simu solidariedade nasaun nian. Atu ita la’o hamutuk ba futuru Timór nian”, nia subliña.
Selebrasaun Konsulta Populár iha tinan ne’e sei hala’o iha Timor-Leste laran tomak ho prezensa husi membru Governu iha kada postu administrativu.
Tema ba selebrasaun tinan ida ne’e mak “Povu maka Luta! Povu maka Terus! Povu maka Manán Funu!!! Povu mak Eroi ba Ukun-rasik an!!!”.
Notísia relevante: Arsebispu konsidera Konsulta Populár nu’udar afirmasaun ba patriotizmu-nasionalizmu
Jornalista: Jesuína Xavier
Editora: Maria Auxiliadota