Introdusaun
Ohin loron Ita hare rasik ho matan no rona rasik ho tilun, katak joven barak mak inklina aan iha droga, prostituisaun, omisídiu, suisídiu, abortu, etc, hodi hanoin destruisaunn ba nia Kreda no rain rasik, ne’ebé la fó valór ba aan hanesan joven ne’ebé di’ak iha sosiedade nia matan. Nune’e, objetivu husi eskritu ne’e mak aborda kona-ba “ Joven ne’ebé di’ak, presiza kontribui ba Kreda ho Nasaun ” hodi fahe hanoin ka reflexão ba malu nuudar joven iha rai ne’e, basá Papa Francisco dehan “a reflexão sobre os jovens e para os jovens nos interpela e estimula a todos nós” (FRANCISCO: 2019: no. 3). Objetivu husi eskrita ne’e mós atu haree ba situasaun ohin loron katak Joven barak mak la iha ona fuan ba nia Kreda ho Nasaun tanba influénsia ona kultura sira seluk hodi invade nia kultura no fiar rasik. Nune’e, uainhira ita temi joven, ita tenke konsiente no reflete katak ita mak futuru no riin ba nasaun no Kreda nian. Tanba Nasaun ho Kreda presiza hela ita joven sira nia kontribuisaun. Tan ne’e pergunta ba ita ida-idak katak ita hanesan joven ne’ebé di’ak, saida mak ita halo ba Kreda no Nasaun ida-ne’e?
Ita bele iha expetativa aas ho ideia sira ne’ebé brillante, maibé ita mós presiza rekoñese katak realidade moris nian mak faktu ida-ne’ebé hatudu katak joven sira presiza akompaña iha aspetu hotu-hotu. Los tebes duni, katak ita mak ema ne’ebé moris hela iha situasaun juventude nian. Nune’e, ita presiza duni luta hamutuk hodi moris ho digno iha situasaun ne’e, hodi alcança saida mak Papa Francisco, dehan “os vossos jovens terão visões e os vossos velhos terão sonhos” (FRANCISCO: 2013: 5), katak ita mak joven ne’ebé iha visão hodi luta ba buat ne’ebé ita-nia bei-ala sira mehi ona. Nune’e Joven nia contribuição mak Cria dame, paz, justisa, estabilidade, prósperu no hanoin ne’ebé construtivo ba nia Kreda no Nasaun. Atu haklean oitoan tema ne’ebé iha, mai ita ba haree hamutuk parte hirak tuir mai ne’e.
- Sé mak joven?
Liafuan Joven mai husi língua latim; ”Juvenis” katak ita hirak ne’ebé sai husi vida infánsia nian hodi tama fali ba ambiente foun ida adultu nian. Bai-bain temi joven ema hanoin kedas, katak joven mak futuru no riin ba nasaun nian. Ida-ne’e nesesáriu tebes atu ita joven sira tenke kuda hanoin konstrutivu nian iha ita aan. Hanesan Papa Francisco dehan “um joven não pode estar desanimado; é próprio dele sonhar coisas grandes, buscar horizontes amplos, ousar mais, ter vontade de conquistar o mundo, ser capaz de aceitar propostas desafiadoras e desejar contribuir com o melhor de si mesmo para construir algo superior” (FRANCISCO: 2019: no. 15). Nune’e, hanesan joven ne’ebé di’ak labele dezanima ou lakon esperansa maibé presizamente mehi ba buat ne’ebé boot no luta hodi alkansa buat di’ak ne’ebé mehi ona. Alende ida-ne’e, joven presiza mós kuidadu nia aan didi’ak, tanba ita-nia an ne’e imajen no semelhansa Maromak nian”Imago Dei”(Cfr.Gen.1;26-27). Tan ne’e hahú husi vida joven nian ne’e, ita tenke hanoin ona oinsá kuidado an, kontribui ba bem ema hotu nian, hanesan São Tomás de Aquino dehan “ema ne’ebé di’ak mak ema ne’ebé konserva nia aan ho di’ak no justo ba bem comum” (AQUINO :2005:65). Portantu, hanesan Joven presiza iha hanoin ne’ebé mak tuir ema hotu nia hakarak.
Situasaun ohin loron nian kontráriu, hodi halo joven maioria mak inklina aan liu ba luxos ne’ebé hamihis nia dignidade, hanesan filózofu boot Sócrates dehan “ os jovens de hoje gostam dos luxos são males comportados desprezam autoridade”. Ida-ne’e atu dehan ohin loron influénsia maldade nian aas liu, nune’e ita presiza hasai aan husi mal ne’e. Tanba dala ruma mos mal ne’e sai tiha ona hanesan toman ida ba ita. Ezemplu konkretu mak hanesan, iha sosiedade ita joven barak uza liafuan mal sai hanesan toman ida ba moris, ko’alia liafuan ruma sempre temi inan-aman ho liafuan ne’ebé la digno. Aliás mal sai ona hanesan verbo auxiliar ou kata bantu atu completa liafuan ne’ebé mak ko’alia. Toman hirak ne’e mak contribui ba destruisaun sosiedade. Nune’e, joven ne’ebé di’ak, nia tenke iha hanoin konstrutivu ba família, ba sosiedade, kreda no nasaun. Atu sai joven ne’ebé di’ak la presiza contribui kedas ho buat boot, maibé hahú uluk husi buat ne’ebé ki’ik, hodi contribui ba fraternidade, domin, dame, iha joven ida-idak nia aan.
Hanesan liafuan popular Jonh keneddy (1976) nian, ne’ebé dehan “Não pergunte o que seu país pode fazer por você. Pergunte o que você pode fazer por seu país/ Keta husu saida mak ó-nia nasaun halo ba ó. Husu ba ó-nia aan, saida mak o halo ba nasaun”. Liafuan ida-ne’e hanesan joven dala ruma la tama kakutak (absurdo), tanba ita moris ona ho mentalidade ida simu mak barak duké fó mak barak. Nune’e, ita-nia tendénsia mak husu ba nasaun atu fó. Maibé Hanesan joven ne’ebé di’ak no matenek presiza metin iha prinsípiu atu labele monu ba mentalidade konsumista ka problema sira. Maibé koko fó ba nasaun moris iha paz, domin,unidade no intelektualidade naton ne’ebé ita ida-idak iha.
- Joven nia papél mak saida?
Papel joven nian mak ser inovadór, responsabilidade, no hanoin konstrutivu hodi kontribui ba nasaun no Kreda liuhusi teória no prátika (ser o homem da palavra). Papa Francisco dehan joven sira-nia kreximentu hatuur iha “a consciência de que toda a comunidade os evangeliza e educa e a urgência de que eles tenham um protagonismo maior” (FRANCISCO: 77: no. 106), katak hanesan joven ne’ebé di’ak presiza iha konsiénsia atu evangeliza no eduka ema seluk atu bele kontra buat ne’ebé la loos hodi la’o tuir dalan no lia-loos. Hanesan Joven, presiza kontribui ba nasaun, kuda domin ba aan rasik no fahe mós ba ema seluk ne’ebé presiza. Joven nia kontribuisaun mak tenke estuda no luta ba dezenvolvimentu nasionál. Katak luta la’ós uza asaun fízika ou brutalizmu, maibé uza matenek, razaun no fuan ne’ebé boot hodi kontribui ba nasaun no Kreda. Basá Papa Francisco dehan “ ser joven, mais duké uma idade, é um estado do coração ” (FRANCISCO: 2019: no. 34)
Nu’udar joven, buat ne’ebé uza mak hanesan livru, buku no lapizeira, hodi estuda atu luta hasoru buat aat ka korrente aat sira ne’ebé mai invade daudaun ita-nia rain. Hanesan filózofa Malaka Yousafzai dehan “ema ida livro ida, lapizeira ida bele muda mundo” One book, One pen can change the world”. Los duni, liafuan sira hanesan ne’e, ba ita joven-estudante, tenke konsidera hanesan ahi ne’ebé sunu ita laran, no provoka ita atu ita brani luta ba matenek hodi kontribui ba nasaun no Kreda nia di’ak. Iha parte ida-ne’e, liga mós ba fiar Joven sira-nian ne’ebé maioria Katóliku ida, tenke tau fiar iha Maromak, e hanesan joven Timor-oan ida presiza prepara aan ho siénsia/ matenek, hodi lori nasaun ho Kreda ba mundu. Joven ne’ebé di’ak buka hametin Kreda ho nasaun iha ita-nia fuan hodi hatudu sai ba mundu katak ha’u-nia rai ki’ik ida-ne’e mós naran morin iha mundu.
É verdade que, tempo joven mak faze konstrutivu nian, ne’ebé impulsa ema atu halo buat ruma. Nune’e, buat ne’ebé importante liubá moris mak hili no halo buat ne’ebé di’ak ba aan no mós ba sosiedade nia di’ak. Maibé ohin loron joven barak lakon ona espíritu esforsu nian, buat hotu hakarak mai ho instantaneidade, tan moris ona iha sosiedade líkida ida-ne’ebé halo ema sente moris ne’e hanesan pasajeira ida. Husi ne’e mak lori ita ba uza sala liberdade hodi mout iha libertinajen. Expresaun ne’ebé dala barak ita rona no repete husi joven sira mak “liberdade”. Maibé dala barak mos liberdade ne’e halo ita lao sala dalan, uainhira liberdade sai ona libertinagem. Ita hanoin katak ho liberdade ida-ne’e, ita bele halo buat hotu-hotu, maibé lae, liberdade lolos katak ita halo ka hili buat di’ak no evita buat aat. Nune’e, juventude mak tempo ida-ne’ebé halo ita experimenta liberdade lolós nian, hodi buka direção ka horizonte ne’ebé los no claro ba ita-nia moris, no hola decisão atu halo buat hotu-hotu di’ak ba an, ba nação no ba Kreda. Ohin loron joven barak ladún hateke ba futuro, tan ne’e mak monu ba situasaun sira hanesan: droga, prostituisaun, asédio seksuál, omisídiu, suisídiu, abortu, etc. No buat seluktan ne’ebé mosu iha ita-nia rain mak violénsia entre grupu arte-marciais, partidu, grupu, hanesan oho malu, baku malu, tuda malu, ne’ebé ikusmai ema bolu ita la’ós juventude maibé “joventuda”. Iha ne’e ita lakon ona ita-nia prinsípiu ne’ebé konsagra iha ita-nia CRDTL be dehan “tendo em vista a construção de um país justo e próspero e o desenvolvimento de uma sociedade solidária e fraterna” (Preâmbulo).
- Juventude mileniál
Juventude iha era mileniál mak tempo ida-ne’ebé furak liu atu desenvolve personalidade no maturidade. Katak joven ne’ebé haree ba passado no presente, liu husi hahalok ema seluk nian, nia koko mehi ka hateke ba futuro atu halo di’ak. Hanesan Papa Francisco dehan “Um joven sábio abre-se ao futuro, mas permanece capaz de valórizar algo da experiência dos outros” (FRANCISCO: 2019: no. 16). Ne’e katak joven sira tenke la’o ba oin maibé la hakotu ligação ba ita-nia passado no história. Hanesan exemplo di’ak sira ne’ebé ita-nia juventude loriku Aswain sira husik hela ona. Joven sira ohin loron maioria mak la gosta simu crítica no hanoin husi ema seluk, dala ruma ema fó hanoin no crítica sempre simu ho liafuan “buat direito ne’e, U boot, Urusan pribadi, etc.”, bainhira ita hanorin an nafatin ho hahalok sira ne’e mak ita sei sai de’it o homem individualista, arrogante, ignorante no indiferente iha família no sociedade nia let hodi hamosu de’it problema, crise, etc. Ho sira ne’e hotu, ita joven presiza duni educação do coração e do caráter, basá Papa Francisco dehan “a glória da juventude está mais no coração do que na força física ou na impressão que provoca nos outros” (FRANCISCO: 2019: no. 9).
Husi toman hirak ne’e, ita mos presiza sai hanesan saida mak Nelson Mandela dehan “heroista inesgotável da juventude, vós os jovens leões, vós os jovens leões dado energia a todas a nossa luta” (MANDELA: 2011: 88). Liafuan ne’e contém coragem, hanorin ita oinsá luta ba rai no povo ida-ne’e nia di’ak. Tanba ne’e, ita joven presiza sai hanesan leão iha hanoin no hahalok, atu luta contra hahalok aat sira ne’ebé estraga ita-nia hanoin ne’ebé di’ak. Nuune, mensagem furak ne’ebé joven ka ita hotu sei relembra nafatin to’o ohin loron mak passagem furak husi São Mateus nian ne’ebé Papa João Paulo II pronuncia dehan “Vós sois o sal da terra e vós sois a luz do mundo/Vos estis, Lux mundi” imi mak masin rai nian no naroman mundu nian (Mt 5, 13-16). Mensagem badak no kle’an ne’ebé sunu juventude loriku Aswa’in sira nia fuan husi loron ba loron. Iha nebá mos Xanana nia texto kmook, Algema de lágrimas dehan povo Timor, laran metin ba igreja (MATOSSO: 2012: 157). katak iha nakukun nian laran igreja nafatin hanesan inan ida-ne’ebé sempre tau matan ba nia oan sira. Ho situasaun sira ne’e, liu de’it tinan ida, iha tinan 1991 joven barak ne’ebé ho aten-brani hamriik hodi se sira nia hirus matan ba força Indonésia, hodi hakilar no haklalak ba liberdade rai doben Timor-Leste nian ho princípio ida maka “mate ka moris ukun rasik aan”.
Acontecimento ne’e ho tan Masacre Santa Cruz ne’ebé organiza husi foinsa’e loriku Aswa’in sira ne’e mak hatudu ba mundo tomak katak Timor iha situasaun ida-ne’ebé grave no iha violação direitos humanos ne’ebé maka’as teb-tebes husi força Indonésia nian. Ho esforço hirak ne’e hotu, hatudu katak joven sira iha fuan ne’ebé manas duni ba luta ida-ne’ebé difícil to’o lakon vida, maibé ho espirito patriotismo no nacionalismo nian ne’ebé forte, hatudu duni resultado iha consulta popular dia 30 de Agsoto de 1999, hodi iha 20 de Maio de 2002 Timor halo restauração da independência, hodi mundo reconhece hikas independência ne’ebé proclama tiha ona iha loron 28 fulan Novembro tinan 1975.
Ita tenke reconhece nafatin faktu partisipasaun luta libertasaun husi juventude loriku aswa’in sira-nian, hodi promove espírito fuan manas ba dezenvolvimentu joven mileniál sira iha processo harí estado RDTL nian. Atu ema hot-hotu la sai de’it passivo iha rai ida-ne’ebé harí ho ruin no ran ne’e, maibé luta atu construi no desenvolve Timor-Leste. Uluk sira luta ona ba ita-nia independência, ohin loron ita tenke cosciente an katak ita mak geração foun ne’ebé luta ba construção no desenvolvimento rai ne’e nian, hodi foti Timor sai hanesan país ida-ne’ebé justo no próspero, e sai hanesan sociedade ida-ne’ebé solidária no fraterna. Husi ne’e ita presiza “Lembrar o passado para melhor construir o futuro”. Nune’e, partisipasaun juventude loriku aswa’in nian lori ita fila fali ba buat ne’ebé ko’alia ona iha parte dahuluk, katak joven sira ninia papél importante teb-tebes iha sosiedade no nação nia moris.
Hanesan joven ne’ebé di’ak presiza halo distinsaun ba liafuan rua escutar e ouvir (FRANCISCO: 2013: 6). Escutar katak ita hanesan joven ida uainhira ita rona buat ne’ebé mak importante ita presiza rona no tau iha fuan hodi implementa iha ita-nia aan no ba ema seluk ne’ebé presiza. Iha ita-nia moris dala barak ita monu iha liafuan ouvir katak importante mak rona de’it saida mak ema ko’alia! signifika rona maibé la tau importánsia ba liafuan ne’ebé mak ema ko’alia. Husi ne’e mak ita lakon valór morál ne’ebé família ho uma Kreda hanorin, hodi lori ita ba sabraut iha hanoin no hahalok
- Lia-kmook ba ita Joven sira
Hanesan joven Ita tenke dehan ba ita-nia-an katak ita la’os de’it futuru nasaun nian, maibé ita mós prezente nasaun no sosiedade nian. Tanba atu hetan futuru ne’ebé brillante hahú husi prezente. Tempu joven mak faze ida-ne’ebé ita hola desizaun importante sira. Tanba ne’e hakaas an ba hodi dehan ba ita-nia an “lae ba imorál” ne’ebé halo ita monu ba grupoismu no radikalizmu, etc. Joven ida-idak mak protagonista atu eduka ida-idak nia aan no ita-nia maluk sira ne’ebé presiza.
Joven sira mak riin no abut ba rai ida-ne’e. Nasaun ida-ne’e ba oin iha ita joven nia liman. Tanba heroista e seminarista Nicolau Lobato afirma “Rai Timor agora hanesan uma ita-nian ona. Uma na’in mak ita. Loke ka taka odamatan, ita mak loke no ita mak taka” (LOBATO: 2018: 371). Los tebes duni, rai Timor agora ita-nian, la’ós ema estranjeiru sira-nian, tan ne’e ita mak na’in ona ba rai ida-ne’e, hodi dehan Timor- Leste la’ós América, la’ós Indonézia, la’ós Austrália, etc. Maibé Timor-Leste mak Timor-Leste, nune’e fo liman hamutuk hodi hadi’a.
Joven ne’ebé di’ak buka halakon ou minimiza insulta malu iha media sosiál, hanesan hatun malu, tolok malu, etc. Hanesan joven, di’ak liu mak hatudu ita-nia aan nuudar joven ne’ebé brani ba lia-loos, justisa no kontribui ba bem comum. Joven ne’ebé di’ak buka asesu ba edukasaun atu bele hadia aan no mós ba sosiedade. Basá Papa Francisco dehan “é através da educação que o ser humano alcança o seu potencial máximo e se torna um ser consciente, livre e responsável” (FRANCISCO: 2020).
Ita liga mos joven sira ba iha setór educação nian, tuir matenek nain ida naran Jean Piaget, dehan “objetivo principál husi educação ne’e mak cria ema foun ida hodi halo buat foun”. Signifika educação iha papel importante atu muda cidadão sira-nia mentalidade no caráter, hodi haburas iniciativa foun ho ideia inovativa ne’ebé diferente. Nune’e, Mahatma Gandhi, dehan “a verdadeira educação consiste em pôr a descoberto ou fazer atualizar o melhor de uma pessoa” (GANDHI), katak edukasaun loloos ne’e mak halo ita deskobre an hodi halo ita-nia aan ne’e sai di’ak liután. Nune’e ita bele ona kaer ba Mandela nia definisaun ne’ebé dehan “a educação é a arma mais poderosa que voce pode utilizar para mudar o mundo” (MANDELA). Ikus mai hanesan duni poeta Timor oan Francisco Borja da Costa ne’ebé dehan “husi rai ne’ebé ita sama ba ne’e sei hamosu ema foun ida”. Los, ita presiza sai ema foun ho hanoin foun hodi buka solusaun ruma ba rai no povu ne’e nia moris. Ema foun mak se? Ema foun mak ita iha tempu ohin loron, ho mentalidade ida katak hanesan joven buka hafoun mentalidade foun ho hanoin ne’ebé konstrutivu, no hanesan joven buka aprofunda nafatin ita-nia valór kultura no relijiaun Katólika nian iha rai-doben Timor-Leste.
Husi ne’e hakarak dezafia ita hotu, atu ita hola uituan pasajen sira ne’ebé riku ho valór sira. Hanesan joven ne’ebé di’ak presiza tau importánsia uluk iha família hodi fó valór ba riku-soin ne’ebé iha, no rona malu iha família liu-liu rona inan-aman. Ohin loron ita hanesan oan ne’ebé lao dook ona husi uma ka husi orijen. Aliás, ita la’o dook ona husi valór morál família nian, mout ba libertinajen hodi influénsiadu ho dijitalizasaun, ikusmai ita-nia hanoin no hahalok sai sabraut hotu. Nune’e, ita presiza fila fali ba uma ka orijen loloos nian, alias come back to our origin. (TAMANNAAH) dehan “Back to the roots” fila fali ba ita-nia abut ka orijen. Ita bele reflete iha pasagen Evanjéliku (Lc 15,11-32) “oan ne’ebé lakon hetan fali,/Filho pródigo”e hanesan mós (Santo Francisco de Assis) dehan; mai ita ba hahú fila fali tanba to agora ita seidauk halo buat ida. Iha pasajen ne’e, hakarak konvida ita fila fali ba ita-nia valór kulturál, morál no étika ne’ebé mak folin tebes iha ita-nia moris hanesan Timoroan.
Konkluzaun
“Halakon tiha EGO hakas aan ba sucesso” (GUSMÃO: 2022). Ohin loron joven barak mak moris nakonu ho hahalok “Ego”. Tan ne’e koko halakon tiha Ego kontribui no diskute hamutuk oinsá atu dezenvolve ita-nia rai no hadi’a ita-nia sosiedade. Tan ne’e halakon EGO hodi valóriza domin. Ohin loron ho mal uso kona-ba facebook, whatsAap, instagram,Tiktok etc, bele mós oho ita-nia futuru. Aliás, ita mak estraga rasik ita-nia mentalidade, ita-nia morál hodi monu ba iha libertinagem. Tan ne’e fó valór ba domin ho smile. Presiza kuda iha fuan saida mak “keep it” katak smile ho laran atu ema hotu haksolok. Hanesan joven halakon tiha (gossip), hatun malu, hamoe malu, etc. Hakas aan, fiar aan lao ba oin. Liafuan ikus, ita mak sei kaer rai ida-ne’e. Nune’e, loke fuan ba malu iha knowledge ou conhecimento, ita mak sei deside rai ida-ne’e nia destinu. Tan ne’e hanesan joven prepara aan ba rai ne’e nia futuru. Confidence, trust it, fiar an ba buka atu haburas hahalok sira ne’e; Knowledge “add quality”,“ego” kill it, gossip “ignore it”, smile “keep it” love “velue it, fo valór”, confidence “trust it”.
Ikusliu, hanesan joven buka tau Interese Kreda no Nasaun nian aas liu buat hotu-hotu duké interesse pesoál. Tanba joven mak sei kaer rai ida-ne’e. Estuda la’ós atu buka traballu (remunerado) de’it maibé, buka atu servi ita-nia rain. Futuru ita-nian, rai ita-nian, no povu iha ita-nia liman, tan ne’e prepara aan nafatin tanba loron sei to’o mai, ita mak sei hamriik iha oin, hodi lori nasaun ne’e ba oin. Como o homem frágil sempre fraco no sala maibé koko hafoun no konverte nafatin atu sai joven di’ak ida iha sosiedade.
*Obrigadu uain ba leitór sira*
Referénsia
PAPA FRANCISCO, Exortação Apostólica Pós-Sinodal Christus Vivit, Loreto, Santuário da Santa Casa, 25 de março de 2019.
_____, Documento Final A fé e o Discernimento Vocacional, 2ª edição, São Paulo, 2013.
_____, Exortação Apostólica Eevangelii Gaudium/ Alegria do Eangelho, Roma, São Pedro, 24 de Novembro de 2013.
BÍBLIA SAGRADA, 1ª Edição, Difusora Bíblica, Lisboa, 2015.
CONSTITUIÇÃO DA REPÚBLICA DE TIMOR-LESTE
MANDELA, Nelson, Deixemos a Liberdade Vencer as Palavras que Mudaram o Mundo, 1ª edição. Lisboa Portugal, 2011.
MATOSSO, José, Digindade Konis Santana no tuba rai Timor nian, edições técnica LDA, Lisboa, Portugal, 2012.
LOBATO, Nicolau dos Reis, “Sabemos, e Podemo, e Devemos Vencer”, Ed., Martinho G. Da Silva Gusmão, Centro Nacional Chega, IP, Díli, 2018.
GUSMÃO, Martinho G. Da Silva, Matadalan Eleitoral, 2ª edição, 25 de Março de 2012.
AQUINO, Tomás, Suma Teolgia, 2ª edição, Vol. 6, São Paulo, 2005.
GUSMÃO, Xanana, Halakon tiha “EGO” hakas aan ba sucesso, disponível em: https://www.google.com/search?client=firefox-b d&q= halakon+ tiha+ ego+ hakas+ an+ ba+ sucessso+ Xanana+Gusmao, acesso no dia 24/09/2022.
PAPA FRANCISCO, Pensar na educação é pensar nas gerações futuras e no futuro da humanidade, in Vatica News, 7 de Fevereiro de 2020, disponível em: https://www.vaticannews.va/pt/papa/news/2020-02/papa-educacao-pensar-geracoes-futuras-futuro-humanidade.html, acesso no dia 17 de Outubro de 2022.
GANDHI, Mahatma, A Verdadeira Educação, in Pensador, disponível em: https:// www. pensador. com/ frase/ NjQ2Nzc5/, acesso no dia 17 de Outubro de 2022.
MANDELA, Nelson, A Educação é a Arma, in Revista Prosa Verso e Arte, disponível em: https:// www. revistaprosaversoearte.com/a-educacao-e-a-arma-mais-poderosa-que-voce-pode-usar-para-mudar-o-mundo-nelson-mandela/, acesso no dia 17 de Outubro de 2022.
