DILI, 26 agostu 2024 (TATOLI)—Governu Koreia Súl sei deporta traballadór timoroan na’in-11 ne’ebé imigrasaun koreanu identifika ona katak sai husi sistema (ilegál).
“Semana ida ne’e nia-laran, Governu Koreia Súl sei deporta traballadór timoroan sira ne’ebé bá serbisu iha Koreia Súl sai husi sistema ka sai ilegál,” Sekretáriu Estadu Formasaun Profisionál no Empregu, Rogério Araújo Mendonça, hateten iha salaun Delta Nova, segunda ne’e.
Governante ne’e dehan, karik durante ne’e traballadór sira hanoin katak ilegál ne’e seguru.
“Ema akompaña ita ho teknolojia ne’ebé avansadu, kona-ba ita-nia paradeiru iha ne’ebé mós sira hatene ita,” nia akresenta.
Tuir Sekretáriu Estadu, traballadór sira ne’ebé sai husi sistema ne’e, molok sai husi Timor-Leste, selebra ona akordu entre traballadór, família no Governu, maibé bainhira to’o iha Koreia Súl númeru sai husi sistema kontinua sa’e.
“Maneira atu evita ida-ne’e hanoin Governu Timor-Leste sei halo diskusaun ho Emabixadór Koreia Súl iha Timor-Leste. Polítika ne’ebé ita atu uza mak bainhira traballadór sai husi ne’e to’o iha Koreia Súl sai husi sistema, mak Governu Timor-Leste liuhusi nia adidu iha Koreia Súl fó avizu di’ak liu tama kedas sistema, lae Governu fó pedidu ba Governu Koreia Súl mak imi iha ne’ebé mós Polísia Imigrasaun sei kaer hodi deporta mai nune’e labele prejudika fali ba maluk sira seluk ne’ebé hein hela oportunidade,” nia dehan.
Notísia relevante : Adidu na’in-rua iha Koreia sei kontrola traballadór timoroan sai husi sistema
Sekretáriu Estadu informa, Governu liuhusi SEFOPE daudaun ne’e seidauk haruka karta.
“Maibé ba dignidade nasaun nian no joven rihun ba rihun ne’ebé hein hela oportunidade mak SEFOPE sei tuur hamutuk reprezentante Governu Koreia Súl iha Timor-Leste hodi foti desizaun nune’e evita sai husi sistema,” nia reforsa.
Biban ne’e, governante ne’e fó hanoin joven sira ne’ebé hetan ona oportunidade ba Koreia Súl atu halo tuir akordu ne’ebé asina ona nune’e labele prejudika-an no maluk sira seluk ne’ebé hein hela oportunidade.
Tuir dadus ne’ebé Agência Tatoli asesu, SEFOPE rejista traballadór hamutuk 1.225 ne’ebé serbisu iha Koreia Súl hahú husi tinan 2009 to’o 2023 sai ona husi sistema.
Jornalista : Arminda Fonseca
Editora : Julia Chatarina
