ME halo esforsu hadi’a no dezenvolve ESTV iha futuru
DILI, 26 agostu 2024 (TATOLI)—Ministériu Edukasaun (ME) daudaun ne’e halo hela esforsu atu hadi’a no dezenvolve Ensinu Sekundáriu Tékniku Vokasionál (ESTV) iha futuru.
“ESTV agora iha Timor ne’e ba faze dezenvolvimentu, ita hatene katak eskola balun ne’ebé ho kondisaun di’ak ona, balun ladún di’ak duni, la signifika eskola ESTV ne’e ladi’ak hotu, eskola ne’e nia kondisaun iha maibé ita tenke mellora. Eskola Tékniku Vokasionál hotu iha faze ba dezenvolvimentu atu halo mudansa no ida-ne’e ita esforsu hela,” Diretór Nasionál Ensinu Sekundáriu Tékniku Vokasionál iha ME, Fernando Mouzinho, hateten iha Vila-Verde, segunda ne’e.
Nia nota, Timor-Leste Coalition Education (TLCE) halo nia observasaun katak ME presiza halo investimentu maka’as ba ESTV, nune’e ME konsidera no tau ona iha planu.
“TLCE halo observasaun ne’e hanesan kontrolu sosiál ne’ebé fó hanoin nafatin ba ministériu, maibé la signifika ministériu la esforsu-an atu mellora kualidade edukasaun iha Timor-Leste. Agora ita iha faze analiza, dezenvolve no faze serbisu hamutuk atu dezenvolve ESTV ho di’ak tanba ida-ne’e mós hanesan IX Governu nia programa prioridade,” nia akresenta.
Notísia relevante : TLCE aseita ho ME nia planu ba investimentu iha ESTV
Iha sorin seluk, Diretór Ezekutivu TLCE, José Monteiro, hateten, ko’alia kona-ba ESTV ne’e katak dezenvolvimentu siénsia inovasaun kreatividade maibé ne’e presiza materiál, ekipamentu, no rekursu umanu ne’ebé kualifikadu, tanba ne’e ME tenke investe maka’as iha parte ida-ne’e.
“Ida-ne’ebé importante liu atu investe mak matéria, ekipamentu inovasaun, ne’ebé ekipamentu ne’e tenke atualiza tuir evolusaun mundu nian. Ita labele ho materiál tuan nafatin, ita tenke atualzia ona kurríkulu no materiál sira ne’e hotu. Agora ita sei apreende oinsá hadi’a mesin ketik sira-ne’e maibé ema agora la uza ona mesik ketik ne’ebé buat sira-ne’e hotu ita tenke atualiza hotu. Ita presiza ekipamentu matéria ne’ebé atulizadu inklui koñesimentu profesór sira-nian,” nia tenik.
Nune’e, nia Diretór ne’e husu ME atu prevee osan hodi investe iha ESTV tanba eskola ne’e diferente ho ensinu sekundáriu jerál sira.
“Ministériu Edukasaun tenke tau osan, tanba ida-ne’e la’ós hanesan ensinu sira baibain, dehan menus kadeira meza ita sei rezolve iha momentu balun, maibé tanba ne’e ESTV, entaun ita tenke rezolve no labele tolera. Ita presiza ekipamentu, hakarak ka lakohi ministériu tutela tenke tau osan ba ida-ne’e no dezenvolve ona,” nia reforsa.
Jornalista : Osória Marques
Editora : Julia Chatarina
