DILI, 30 jullu 2024 (TATOLI)–Timor-Leste Coalition Education (TLCE) aseita ho planu Ministériu Edukasaun (ME) ne’ebé atu halo investimentu iha Eskola Ensinu Sekundáriu Tékniku Vokasionál (ESTV) iha tinan oin.
“Kona-ba investimentu iha ESTV sira iha Timor-Leste Governu tenke investe duni, maibé atu investe sá tinan mak presiza haree lai sira-nia kompromisu to’o iha ne’ebé, ida-ne’e presiza justifika ho planu orsamentu. Tanba daudaun ne’e urjénsia ba Timor-Leste mak kualidade rekursu umanu ne’ebé hanesan xave ba kualidade edukasaun. Nune’e, Ministériu Edukasaun tenke tau konsiderasaun ba problema ne’e,” Diretór Ezekutivu TLCE, José Monteiro, hateten, iha ninia knaar fatin, Caicoli, tersa ne’e.
José Monteiro dehan, atu hetan edukasaun ne’ebé kualidade maka tenke tau iha konsiderasaun problema klásiku sira hanesan infraestrutura edukativa, mobiliária, fasilidade no formasaun profesór sira.
Maibé importante liu mak ME tenke iha ideia alternativa, tenke iha paradigma foun bainhira atu trata edukasaun, inklui aprosimasaun teknolojia no inovasaun.
Notísia relevante : ME planeia tinan oin tau investimentu boot ba ekipamentu prátika ESTV
Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, hateten, ME iha ona planu no esforsu atu halo investimentu ba ESTV sira iha tinan oin.
“Tanba ESTV iha Natarbora ne’e estudante iha 200-resin, ESTV Dotik Same estudante iha 96, ESTV iha Betano iha estudante 80-resin. Tanba ida-ne’e, Ministériu Edukasaun nia planu iha IX Governu Konstitusionál ne’e mak halo investimentu boot liu iha ensinu sekundáriu tékniku vokasionál,” Sekretáriu Estadu akresenta.
Tinan oin Governu bele investe maka’as liu iha ekipamentu prátika sira atu nune’e bele aumenta taxa partisipasaun ka matrikulasaun estudante iha tékniku vokasionál.
“ME nia polítika iha tinan 2024 mak hakarak redús tasa matrikulasaun estudante sekundáriu jerál no hasa’e taxa partisipasaun ba ESTV. Maibé ita la atinje meta ida-ne’e, entaun ami nafatin esforsu hodi halo planu estratéjiku ida nune’e bele avansa ba implementasaun,” nia tenik.
Diretór Nasionál Ensinu Sekundáriu Jerál iha ME, Benjamin Fernandes, haktuir, eskola ensinu sekundáriu tékniku vokasionál rekonverte ba ensinu sekundáriu jerál tanba estudante timoroan maioria la interrese asesu ba eskola ensinu tékniku vokasionál.
“Ita hatene katak mundu ne’e avansa ho eskola tékniku vokasionál, maibé ita Timor-Leste pelu kontráriu, tanba estudante laiha vontade asesu ba tékniku vokasionál. Tékniku ne’e mundu presiza maibé iha Timor-Leste estudante ladún iha interrese,” nia lamenta.
Nia nota, estudante iha rai-li’ur hanesan iha Filipina ko’alia barak liu kona-ba eskola tékniku vokasionál.
“Entaun, tuir observasaun katak rekursu ba tékniku mak seidauk di’ak. Ida-ne’e ita mós rekoñese materiál ne’e ita tau orsamentu ne’e fásil no ita bele sosa maibé rekursu umanu ne’e buat ne’ebé difísil. Tanba ne’e ita tenke tau iha planu hodi halo investimentu,” nia katak.
Jornalista : Osória Marques
Editora : Julia Chatarina
