DILI, 26 agostu 2024 (TATOLI)–Jerente Empreza PT Eureka Gagas Utama husi Indonézia, Daniel Silalahi, informa, reabilitasaun Igreja Santo António Motael sei estende to’o setembru tanba iha serbisu adisionál ne’ebé komplexu husi obra ne’e.
“Ita-nia limitasaun ba obra ida-ne’e to’o iha loron 05 setembru. Serbisu adisionál komplexa no serbisu reabilitasaun sobu no hafoun hanesan ida-ne’e kleur duni,” Jerente Empreza informa ba Agência Tatoli, iha Motael, segunda ne’e.
Tuir responsável obra ne’e, serbisu adisionál hanesan fruta no sobu ba obra reabilitasaun eskritóriu ne’e komplexa, tanba ne’e presiza extende.
Jerente dehan, serbisu ne’ebé sei iha atu termina mak halo eskritóriu rua foun atu taka kalen no plafon, ukir no pinta gruta no pinta interiór igreja nian.
“Serbisu atividade igreja nian mós kontinua la’o ne’ebé dalaruma mós serbisu tenke para oituan, tanba ne’e mak enkomoda hotu,” nia akresenta.
Notísia relevante : Reabilitasaun igreja Motael atu simu Papa Francisco atinje 80%
Serbisu ba obra reabilitasaun ne’e atinje ona 80% resin, nune’e empreza sei esforsu másimu hodi bele termina iha tempu badak.
Padre Paróku Motael, Padre Guilhermino da Silva, hateten, serbisu reabilitasaun ba igreja iha posibilidade bele hotu depoizde vizita Amu Papa nian.
“Maibé fatin ne’ebá sei uza husi Polísia Nasionál Timor-Leste no FALINTIL-Forsa Defeza Timor-Leste iha loron 09 no 11 setembru atu halo seguransa iha área Motael. Serbisu reabilitasaun ne’e hotu depoizde vizita Papa,” nia katak.
Jornalista : Jesuína Xavier
Editora : Julia Chatarina
