DILI, 25 agostu 2024 (TATOLI)—Asosiasaun Jornalista Timor-Leste (AJTL), domingu ne’e, relaiza kongresu AJTL da-lima hodi hili nia esturutura foun ho pakote úniku no to’o ikus Zevonia Vieira reeleita sai Prezidente AJTL ba períodu 2024-2028.
Kongresu AJTL ba dalima ho nia tema “Respeita Sala Redasaun, Respeita Públiku nia Direitu ba Informasaun” ne’e realiza iha salaun Comissão Nacional da Eleições (CNE) Colmera iha sábadu no dimungu (24-25 agustus 2024) ne’e.
Iha preparasaun eleisaun ne’e, hamosu de’it pakote kandidatura únika ne’ebé kontinua ba votasaun ne’ebé rezulta votu hitu (7) la konkorda no 109 konkorda, nune’e fó biban ba Zevonia Viera kontinua lidera AJTL.
Zevonia Vieira kompromete hodi nafatin luta no promove liberdade imprensa no espresaun ba Timor-Leste hanesan baze fundamentál AJTL nian no kontinua hala’o kooperasaun ho Governu no parseriu sira, hodi dezenvelve mídia no hametin rede rejionál no globál.
“Nune’e, luta ba liberdade imprensa no espresaun ne’e forte liután. Kongressu ida-ne’e ho tema iha ne’e sei metin liután ba AJTL nia espíritu hodi alerta ba ema hotu kna’ar ne’ebé ita hotu halo, kumpre misaun ne’ebé fundadór sira halo ona. Ita labele husik ema ida iha kotuk,” Prezidente AJTL, Zevonia Viera, hateten iha nia diskursu iha salaun CNE, Caicoli, domingu ne’e.
Nia mós alerta nafatin ba jornalista sira hodi labele monu ba propaganda no interrese grupu nian maibé kontinua ko’alia lia-loos no kontra informasaun falsu sira.
Antes ne’e, iha loron dahuluk, kongresu ne’e hahú ho diskusaun nakloke ba tópiku rua diferensa mak (1) Importansia Asosiasaun Jornalista nia luta ba Liberdae Imprensa ho Espresaun iha Sudeste Aziatiku no (2) Jornalista Defensor Direitu Umanus, La’ós Portavós Polítika.
Iha fatin hanesan, Sekretaria Estadu Komunikasaun Sosial, Expedito Dias Ximenes parabeniza estrutura AJTL nian ba periodu 2024 – 2028 no husu espera bele kopera diak ho governu taba asosiasaun jornalist mak parseiru importante ba setór komunikasaun sosial.
“Organizasaun ida-ne’e moris iha Timor ukun aan iha 1999. Kongressu ne’e hatudu katak mídia no jornalizmu moris iha demokrasia nia laran, ida-ne’e hodi fó apresiasaun ba sira-ne’ebé hola parte iha organizasaun nia laran. Estadu, Governu no komunidade presiza meiu komunikasuan sosiál hanesan ponte prinsipál tanba midia mak pilar importante ba demokrasia. Ida-ne’e hatudu katak AJTL prontu hamutuk ho Governu dezenvolve rai ne’e ba oin,” nia dehan.
Nia rekoñese, to’o agora Timor-Leste nafatin hodi kombate hoax ka informasuan falsu sira tanba uza liberdade espresaun la tuir etika no lojika.
Nune’e, nia dehan, prinsipiu jornalizmu mak laiha influénsia poder polítika no ekonomika iha sala redasaun.
Membru estrutura AJTL périodu 2024-2028 ne’e kompostu husi Prezidente, Zevonia Vieira husi Neon-Metin, Vise-Prezidente, Manuel Sarmento Gusmão husi RTTL, Ep, Sekretáriu Jerál mak Joaquim de Fatima Coutinho husi Rádiu Komunidade Maubisse, Vise-Sekretáriu Jerál I mak Sancho Alves Nahac husi Rádiu Komunidade Taroman, Vise-Sekretáriu Jerál II mak Desi Reis husi Rádiu Liberdade.
Xefi Departamentu Advokasia no Kapasitasaun, Constâncio dos Santos Vieira husi RTTL, Ep no Xefe Departamentu Balibó V iha AJTL ne’e, Acacio Pinto husi Lafaek News.
Estrutura kuadru AJTL périodu anterior 2020-2024 mak hanesan Prezidente Zevonia Vieira husi Neon Metin, Vise-Prezidente Aniceto dos Reis husi RTTL, Ep, Sekretáriu Jerál mak Alberico Junior, Vise-Sekretáriu Jerál I mak Bela Corte Real husi RTTL, Ep, Vise-Sekretáriu Jerál II mak Acacio Pinto husi Timor Post.
Tuir mai, Alia da Silva nu’udar Finansa, Sekretáriu Órgaun Ezekutivu, Aveiro Ximenes husi RTTL.Ep, Sekretáriu Kuadru Rita Almeida husi Tatoli, I,P-Ajénsia informasaun ofisiál Estadu Timor-Leste, Prezidente konsellu Fiskál mak David Hugo, Prezidente Konsellu Étika mak Virgílio Guterres.
Xefe Departamentu Kapasitasaun no Treinamentu mak Maria Bibel, Xefe Departamentu Peskiza no Planeamentu mak Efrem Guterres no Xefe Departamentu Balibo V mak Jeki das Neves, Xefe Departamentu Multimedia mak Jonio Soares no Flamo Soares, Xefe Departamentu Relasaun Esterna mak António Febu husi Timor News.
Jornalista : Cidalia Fátima
Editor : Cancio Ximenes
