Dom Leandro husu sarani kumpri orden seguransa durante vizita Papa Francisco
BAUCAU, 26 agostu 2024 (TATOLI) – Bispu Diozese Baucau, Dom Leandro Maria Alves husu sarani Diozese Baucau atu kumpri orden seguransa durante partisipa peregrinasaun vizita Papa Francisco iha Timor-Leste.
Bispu Diozese Baucau, Dom Leandro Maria Alves, esplika liuhosi enkontru konjunta entre Komisaun Organizadora husi munisípiu haat hanesan Lautém, Viquque, Manatuto no Baucau iha ona desizaun difinitiva, liuliu kona-ba seguransa durante viajen husi kada munisípiu ba partisipa misa solene iha Tasi-Tolu, Dili.
“Preparasaun ne’ebé mak hala’o tiha ona durante ne’e to’o iha momentu ne’e atubele halao peregrinasaun di’ak liután, enkontru iha ona desizaun difinitiva ne’ebé mak foti ona ba Diozese Baucau oinsá atu mobiliza peregrinhu sira,” Dom Leandro Alves hateten iha Vila Antiga, segunda ne’e.
Dom Leandro Alves husu peregrinu hotu, respeita orden seguransa nian, liuliu evita labele lori sasán kro’at no alkólika, tanba sei iha pasa revista husi seguransa sira ba kada peregrinu.
Liuhosi enkontru entre Komisaun Organizadora deside peregrinu husi Diozese Baucau sei hahu viajen iha loron 09 fulan-setembru, ne’ebé sei hahú husi munisípiu Viquque aranka dadeer oras 09:00 sei kontinua hamutuk ho Lautém no Baucau iha oras 14:00 no sei hala’o viajen hamutuk ho Manatuto iha lokraik no sei remata iha fatin deskansa ne’ebé prepara husi komisaun organizadora nasionál.
Fatin deskansa iha Hera ne’ebé tuir informasaun preparadu ona hanesan garante seguransa, seguru no fasilidade sira hanesan bee-moos no sanitáriu ne’ebé sei tuir kada munisípiu.
“Ita agradese, tanba iha koordenasaun ne’ebé di’ak entre Padre Pároku ho Prezidente Autoridade Munisípiu idak-idak inklui seguransa sira. Ita haree serbisu di’ak tebes,” Dom Leandro akresenta.
Peregrinu Diozese Baucau sei kontinua utiliza transporte husi fatin akampamentu to’o iha rotunda Prezidente Nicolao Lobato, Komoro no sei kontinua la’o-ain antes partisipa misa solene iha loron 10 fulan-setembru, Tasi-Tolu, Dili.
Tuir dadus totál peregrinu neebe rejista ona husi Diozese Baucau komposta hosi Vikeke, Manatuto, Baucau no Lautém hamutuk rihun 31-resin.
Notísia relevante: PNTL Baucau sei reforsa seguransa iha nasionál
Jornalista : Natalino Belo
Editór : Evaristo Soares Martins
