DILI, 27 agostu 2024 (TATOLI)–Prezidente Institutu Kualidade Timor-Leste, Institutu Públiku (IQTL, sigla portugés), Rosito de Sousa Monteiro, informa, ekipamentu kalibrasaun ba estabelesimentu laboratóriu nasionál to’o ona Timor-Leste.
Organizasaun Nasaun Unida ba Dezenvolvimentu Industriál (UNIDO, sigla inglés) atribui ekipamentu kalibrasaun ne’e husi Viena, Austria.
“Ekipamentu ba kalibrasaun nian ne’e agora besik ona Portu Tibar. Konta to’o ona Timor maibé atu halo instalasaun ne’e sei hein péritu sira ne’ebé UNIDO mak kontrata ne’e mai instala depois vizita Papa Francisco iha setembru 2024,” Rosito de Sousa, informa ba Agência Tatoli, via telefónika tersa ne’e.
Nia dehan, antes ne’e IQTL no UNIDO halo ona koordenasaun molok ekipamentu ne’e to’o no realiza ona enkontru ida atu halo reabilitasaun faze daruak ba laboratóriu internál iha aldeia Boa Morena, suku Motael, postu administrativu Vera Cruz, munisípiu Dili.”Ita-nia kooperasaun ho UNIDO atu estabelese laboratóriu nasionál ba teste kualidade produtu,” nia akresenta.
Notísia relevante : IQTL fulan ne’e hahú halo levantamentu dadus ba produtu lokál sira
Ekipa IQTL halo esforsu reabilitasaun laboratóriu molok ekipamentu hirak ne’e to’o nune’e bele kompleta fasilidade sira, liu-liu tau fire protection system, tau ar-kondisionadu no seluk tan, tanba kestaun ne’e nu’udar rekomendasaun husi UNIDO tuir padraun internasionál.
“Prosesu agora la’o hela no seidauk hotu. Reabilitasaun ne’e to’o novembru mak foin hotu ne’ebé hanoin depoisde vizita Amu Papa maka reabilitasaun ne’e bele finaliza nune’e ekipamentu to’o ona mai ne’e bele instala ona,” nia tenik.
Aleinde ne’e, daudaun ekipa téknika husi institutu sira hahú halo preparasaun hodi aprezenta akizisaun sosa mákina tolu hanesan halo teste kafé, bee no mina-nuu ba konkursu públiku.
“Antes atu sosa, tuir rekomendasaun husi UNIDO, tenke iha uluk laboratóriu, entaun agora foku ba reabilitasaun daruak edifísiu laboratóriu ninia no prosesu aprovizionamentu sei fó sai konkursu públiku. Tanba tinan kotuk ne’e halo uluk reabilitasaun ba edifísiu,” nia tenik.
Orsamentu ne’ebé prevee halo reabilitasaun edifísiu laboratóriu IQTL faze dahuluk iha tinan kotuk hamutuk $89.000 no prevee ba reabilitasaun faze daruak tinan ne’e $84.000.
“Atu dehan de’it katak antes ramata tinan ne’e, ita iha ona laboratóriu nasionál ida. Ita estabelese tarde oituan tanba prosesu mak la’o kleur,” nia reforsa.
Jornalista : Arminda Fonseca
Editora : Julia Chatarina
