MNEK konvense hela empreza Brunei atu mai investe iha TL
DILI, 27 agostu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, konvense ona empreza Golden Corporation husi nasaun Brunei ne’ebé sai produtór Bo’ek atu investe iha Timor-Leste no empreza Daikyo Industrial Gas hanesan produtór Oxijéniu.
Empreza Golden Corporation espesilizada iha produsaun Boek hamutuk ektar-459, hodi halo produsaun kuantidade bo’ot, nune’e exporta ba Austrália no nasaun seluk.
“Ida ne’e ita hare katak valor investimentu ida di’ak tebes no mós valór nutrisaun, ha’u hanoin importante tebes ita ko’alia hamutuk, sira bele ba iha Timor, tanba iha Timor iha nesesidade ba agrikultura, nutrisaun ba seguransa alimentar, importante ba ida ne’e no mós ba destinasaun turizmu,” Ministru Bendito tenik iha nota ne’ebé Agência TATOLI asesu husi media MNEK, ohin.
Aprosimasaun husi Timor-Leste ba empreza produtór Boek ne’e, tuir Ministru Bendito Freitas, bele fornese nesesidade konsumu iha indústria ne’ebé planeia atu dezenvolve iha futuru.
“Se aban bai rua Timor halo investimentu iha seitór petróleu no seitór barak presiza importante fornesimentu no sira nia produsaun kuantidade boot tebes, Kompaiña ida ne’e deterninadu no sira hetan apoiu husi Lurai Brunei Darussalam, ha’u hanoin importante investe ba seitor ida ne’e,” Bendito hateten.
Ministru ne’e dehan, Timor-Leste iha área potensiál hanesan Covalima, Natabora no Betanu, ne’ebé iha espasu ba investimentu produsaun boek.
“Importante tebes karik iha interasaun ho ita-nia emprezáriu ligadu ho seitór agrikultura, iha produsaun Boek importante tebes, sira iha vontade atu ba Timor, hein de’it vontade husi ita nia parte, Ministériu Agrikultura no Peskas, presiza kampu no sei di’ak ba futuru, di’ak ba nutirsaun, bele oferese ba hotel sira no ita-nia ekonomia bele diversifikadu,” nia argumenta.
Iha sorin seluk MNEK vizita mós instalasaun empreza Daikyo Industrial Gas ne’ebé dezde tinan 2000 investe iha Timor-Leste, iha àrea produsaun oxijénio.
“Dezde tinan 2000 Kompaiña Daikyo Industrial Gas iha Timor no kompaiña ne’e rasik ajuda Timor-oan na’in rua hodi estudua iha Laksamana College iha Brunei, ha’u hanoin katak, kompaña la’ós servisu de’it, maibé iha mós kontribuisaun ba formasaun Timoroan sira,” Ministru ne’e hakotu.
Setór agrikultura no turizmu iha Brunei bele sai ezemplu ba TL
MNEK Bendito Freitas deskuti ho Ministru Rekursu Primariu, Agrikultura no Turizmu kona-ba poténsial koolaborasaun iha seitór agrikultura no turizmu iha futuru.
Enkontru ne’ebé partisipa mós husi Embaixadór Timor-Leste ba Brunnei Darrusalam, Abel Guterres no Diretór Jerál Assuntu Bilaterál Marcos da Costa, análiza mós modelu setór agrikulutra no turizmu ne’ebé bele sai referénsia ba Timor-Leste.
“Ita iha diskussuan di’ak, ita ko’alia kona-ba kooperasaun iha àrea turizmu no mos produsaun fós ho kualidade di’ak, ne’ebé kilu ida ka rua bele produz too kilo atus haat, ida ne’e bele sai hanesan vantajen ba Timor no mós modelu ida ba nutrisaun,” MNEK tenik.
Molok ne’e, Prezidente Repúblika José Ramos Horta mós vizita ona Brunei Darussalam, hodi analiza mos kooperasaun iha àrea agrikultura.
“Ita-nia Prezidente iha vizita ne’ebé realiza iha novembru, ko’alia ona koperasaun liu-liu atu garante seguransa alimentar, importante tebes, kombate mos subnutrisaun, stunting no labarik sira ne’ebé iha problema ho saúde no mós iha area barak, turizmu agrikultura no kapasitasaun rekursus humanus,” katak.
Tuir MNEK, iha ona desizaun atu intensifika komunikasaun, hodi konkretiza projektu kooperasaun ne’ebé sei estimula dezenvolvimentu sustentável.
“iha desizaun, prezisa kontinua komuikasaun bele halo mos viajen husi Brunei ba Timor-Leste no husi Timor bele mai bele aprende, bele servisu hamutuk, kooperasaun hodi promove dezenvolvimentu, integradu sustentável no diak ba ita-nia rain” Xefe Diplomata ne’e konklui.
Jornalista: Hortencio Sanchez
Editór: Florencio Miranda Ximenes
