DILI, 28 agostu (TATOLI)– Pároku igreja Santo António Motael, Pe. Guilhermino da Silva, hateten parokia Motael rejista ona sarani sira hamutuk 12.000 atu partisipa misa solene ne’ebé Papa Francisco prezide iha Tasi-Tolu, iha 10 setembru 2024, iha tuku 16h30 lorokraik,
“Parokia Motael rasik iha ona rihun 12, tanba iha loron ikus-ikus ne’e sarani sira mai rejista barak. Dala ruma to’o sábadu taka ne’e bele to’o númeru rihun 15,” Pároku igreja Motael, Pe. Guilhermino da Silva, hateten ba Agência Tatoli, iha Tasi-Tolu.
Tuir nia, voluntariu sira halo rejistu ba sarani sira-ne’e laiha biban atu deskansa, tanba sarani sira mai rejistu barak.
Parokia la limita sarani sira halo rejistu hodi tuir misa no hasoru malu ho Santu Padre iha Tasi-Tolu.
“Ema idade tinan ida to’o 15 hamutuk rihun rua no sira ne’ebé ferik ho katuas idade 60 to’o 84, lista ne’ebé ha’u verifika mak lista ne’e ema 60 resin,” nia dehan.
Nia hein katak sarani sira bele ba kontinua rejista aan hodi simu vizita Pastorál Amu Papa no misa solene iha setembru hodi simu grasa no bensaun.
Jornalista : Jesuína Xavier
Editór : Cancio Ximenes
