DILI, 28 agostu 2024 (TATOLI)—Prezidente Repúblika (PR), José Ramos Horta, liuhusi dekretu Prezidente Repúblika númeru 88/2024, fó kondekorasaun ba Sekretáriu-Jerál Organizasaun Nasaun Unida (ONU), Enjiñeiru António Manuel de Oliveira Guterres, ho Orden Timor-Leste, Grande-Colar.
Orden Timor-Leste kria husi dekretu-lei númeru 20/2009, 6 maiu, destina hodi rekoñese no agradese ba sidadaun nasionál no estranjeiru ba ninia komportamentu ka aktu ne’ebé prátika ba kontribuisaun signifikativu ba benefísiu nasaun no timoroan ou umanidade.
Orden Timor-Leste iha grau haat mak hanesan Grande Colar ne’ebé atribui ba Xefe Estadu no Governu ba aktu dignatáriu nasaun amigu.
Kompeténsia Prezidente Repúblika hodi halo konsesaun Ordem Timor-Leste no ezerse konfrome tuir artigu 5 iha aleina “a” husi dekretu-lei númeru 20/2009, 6 maiu.
“Enjiñeiru António Guterres, Sekretáriu Jerál ONU dásia dezde 01 janeiru 2017, ho istória naruk dedikasaun no advokásia kontinua iha defeza igualidade no solidariedade entre povu, justisa no direitu umanu no pás, sai ezemplár no ispirador, nune’e mós altu komisáriu ba refujiadu iha 2005-2015, ninia kontribuisaun ba umanidade no direitu umanu,” refere komunikadu imprensa ne’ebé Agência TATOLI asesu husi mídia Palásiu Prezidensiál, kuarta ne’e.
Ekuantu Primeiru-Ministru Portugál iha 1995-2002, nu’udar defensír proeminente ba direitu povu Timor-Leste ba auto-determinasaun no indepedénsia dezempeña papél fundamentál iha rezolusaun kestaun Timor-Leste, no testamuña ba empeñamentu ba Sekretáriu Jerál iha kestaun globál no iha faktu Timor-Leste agora nu’udar sai ezemplu ba mundu hodi unidade lori ba mundu pás no seguransa liuhusi diplomásia efikásia.
Nia sempre nu’udar amigu Timor-Leste ba ninia serbisu no esforsu garante Timor-Leste goza liberdade ne’ebé iha atualmente no direitu independente ho nasaun sira seluk.
Nune’e, Prezidente Repúblika tuir termu atigu 85 alinea “j” iha konstituisaun no konjuga ho artigu 2 iha dekretu-lei númeru 20/2009, 6 maiu, dekreta kondekora Enjineiru António Manuel de Oliveira Guterres, Sekretáriu Jerál ONU ho Ordem Timor-Leste, Grande-Colar.
Jornalista : Nelson de Sousa
Editór : Cancio Ximenes
