Hanoin hikas Povu nia desizaun iha 30 agostu 1999

BOBONARO, 29 agostu 2024 (TATOLI)-Padre Parókia Igreja Nossa Senhora Imaculada da Conceição, postu administrativu Bobonaro, Padre Ernesto Barreto, halo reflesaun hodi hanoin hikas povu nia desizaun iha loron 30 agostu tinan 1999 liubá, tanba iha tempu ne’ebá situasaun perigozu maibé ho aten barani povu sira nafatin hamriik ho firmeza ba vota hanesan loloos atu simu komuñaun iha eukarístia santu.

Tuir Pároku ne’e katak, sei manas iha jerasaun ida-ne’e nia neon ho laran katak memória luta la’ós fasíl, husi luta gerilla tama ba sidade,hakat tama ba kurasaun inimigu nia.

Nia haklaken, iha tinan 25 liubá, situasaun presaun, komplikadu tebes, maibé espíritu kompaisaun forte liu, ho nia korajen optismista no mehi ida deit, katak mate ka moris ukun rasik-aan, laiha kbi’it ida mós atu trava no impoin.

“Hanoin no observa povu doben  ida ne’e nia entuziasmu, hakat ba fatin votasaun ho firmeza, dadeersan nakukun de’it antrian naruk hanesan loloos simu komuñaun iha eukarístia santu. Ho fiar-an ba hakuak boletin de votu ho pregu, hili autonomia no ukun rasik-an,” Padre Ernesto haktuir iha omilía selebrasaun misa agradesimentu Konsulta Populár 30 agostu ba da-25, kinta ne’e.

Padre ne’e esplika, frente diplomátika, frente armada no frente klandestina, mak hameik pregu nia tutun hodi hakotu destinu rai ida, povu ida no nasaun ida,tñ tanba ho pregu ne’e duni mak detrmina soberania nasaun Timor-Leste nian.

Tuir nia, ohin loron lian krítika mai naba-naban husi adversáriu polítiku sira atu labele haksolok iha povu  nia halerik tanba sei la ho akontesimentu tinan 25 liubá ita sei la goza patarata.

Maibé bibi-atan ne’e fiar katak, neneik no beibeik foti oin hakat heteke ba futuru ne’ebé nakonu ho optimista, Timor-Leste sei sai prosperiedade armónia, hamoris rekonsilasaun ba malu, moris iha dame, domin no justisa.

Nia dehan, tinan 25 ba kotuk povu hotu-hotu haklalak, kontente ho rezultadu ukun-an, maibe agora tempu ona atu ema idak-idak kontribui ba dezenvlvimentu nasionál.

“Povu iha baze hein promesa sira-ne’ebé hato’o nanis iha kampaña polítika, fó netik estrada, dudu netik we-turuk oan-ruma to’o sira-nia varanda, tanba dalabarak besik kanu dada naruk los, mai to’o uma oin sira bee-maran ona, fó asistensia saúde, edukasaun ne’ebé ho kualidade,” Padre ne’e hateten.

Biban ne’e, Ministru Justisa, Sérgio Hornai, lori IX governu nia naran sente kontente no haksolok tebes bele partisipa iha selebrasaun misa agradesimentu ne’e hamutuk ho povu no sosiedade tomak iha postu administrativu Bobonaro.

Selebrasaun misa solene ne’e nu’udar sentidu agardesimentu ba Maromak relasiona ho konkista ne’ebé Timor-Leste hetan durante tinan 25 nia laran liuliu ba determinasaun luta independénsia.

“Biar sira bele ona, mas ohin ho ita-nia misa ne’ebé halo partikulasaun ba bíblia no ita-nia evenjellu ne’ebé ita husu, atu nune’e sira bele hamutuk nafatin iha sira-nia espíritu, hamutuk nafatin ho ita ba luta libertasaun pátria ida-ne’e,” Ministru Sérgio akresenta.

Nia rekoñese durante tinan 25 nia laran sei iha dezafiu no obstákulu lubuk oan ida, mibé la kuran buat ida hanesan ema fiar-na’in, fiar ba Maromak, natureza, matebian sira ohin bele festeza selebrasaun misa agardesimentu ba loron istóriku ne’e.

Notísia relevante: Misa ba Konsulta Populár iha Baucau, Timoroan hotu tenke kontribui ba prosesu dezenvolvimentu

Jornalista: Sérgio da Cruz

Editór: Evaristo Soares Martins