Ministru Justisa presta omenajen ba restu mortál 197 iha Malilait
BOBONARO, 29 agostu 2024 (TATOLI)-Ministru Justisa (MJ), Sérgio Hornai, hamutuk ho estrutura, autoridade munisípiu Bobonaro, komunidade no estudante sira, kinta ne’e presta omenajen ba restu mortal hamutuk 197 ne’ebé prezerva hela iha osoáriu suku Mali-lait hodi komemora konsulta popular 30 agostu ba da-25.
Hafoin tau ai-funan, lia-na’in no veteranu sira hato’o preokupasaun ba Ministru Sergio Hornai, tanba kondisaun osoáriu ne’e iha de’it uma ki’ik-oan ida ne’ebé la dignu atu konserva restu mortál 190.
Ministru Justisa, Sérgio Hornai husu ba autoridade munisípiu, postu, veteranu no lia-na’in sira hotu hamutuk junta forsa halo planu ba oin hodi governu bele kria fatin dignu ba eroi hirak-ne’e.
“Hau hanoin veteranu sira vizaun ida deit, liberta pátria, liberta povu, tau ita-nia eroi, eroína sira iha nia fatin, tanba sira maka iha ita-nia kotuk, sira-nia isin laiha ona, maibé iha memória no ita tenke oha espíritu prezerva,” Ministru Justisa hateten.
Notisia relevante: Governu presiza harii fatin hodi konserva restu mortál 197 iha Malilait
Seguransa Osoáriu Malilait, Veteranu Fernando de Oliveira, husu Ministru Justisa atu hatutan preokupasaun ne’e ba ministériu relevante.
“Agora fatin ami prepara tia ona,bdepois ami veteranu sira tau hamutuk osan, mas lahatene bainhira loos mak Governu atu halo,” nia hato’o ba Ministru, Sérgio Hornai, iha osoáriu ne’e.
Nia hatutan, Governu presiza tau iha koniderasaun atu harii jardín eroi, tanba fatin preparadu ona.
“Sira veteranu tau osan kada ema $50, ami dudu tiha fatin ne’e to’o agora abandonadu, horibainhira Sekretáriu Estadu Veteranu ‘Merak’ mai haree dehan atu sukat, maibé até agora seidauk,” nia hateten.
“Se imi husu governu, hau mai la lori buat ida, ha’u mai ho vizaun ida de’it, hamutuk ho ita-nia autoridade munisípiu, postu, suku, lia-na’in sira no veteranu.”
Nia dehan, omenajen ne’e atu fó onra no gloria ba Asuwain sira tanba ho saudozu sira nia luta mka ohin loron Timor-leste bele hamrik hanesan nasaun soberanu no independenti.
Enkuantu osoáriu ne’e harii iha tinan 2016 ho kontribuisaun osan husi veteranu sira, hafoin governu orienta halibur restu mortál ne’ebé naklekar iha parte tasi no ai-Laran.
Notísia relevante: Ministru Justisa konsidera eroína Maria Tapó nia luta indispensavel
Jornalista: Sérgio da Cruz
Editór: Evaristo Soares Martins
