Top

Timoroan presiza halo reflesaun kle’an iha komemorasaun konsulta populár ba da-25

Populasaun sira forma iha sentru votasaun hodi deside Timor-Leste nia destinu liuhusi sira-nia votu, iha SDN 1 Bairru Formoza, Dili, 30 Agostu 1999. Imajen/Dok.Espesiál

DILI, 29 agostu 2024 (TATOLI)—Prezidente Komité Orientadór 25, Constáncio Pinto, apela timoroan hotu atu halo reflesaun kle’an iha ámbitu komemorasaun loron konsulta populár ba da-25 (30 agostu 1999-30 agostu 2024) hodi haree ba futuru ne’ebé mak pozitivu.

Nótísia Relevante: Prezidente CO25 husu líder nasionál sira hamutuk liberta povu husi mukit

Tinan ida-ne’e, nia dehan, Timor-Leste sei komemora loron konsulta populár nu’udar momentu istóriku ne’ebé mak povu deside futuru Timor-Leste nian ba ukun rasik-aan, no rezultadu iha momentu ne’e mak ohin loron ema hotu hetan liberdade másimu konstrui Estadu Direitu Demokrátiku ida.

“Iha momentu ne’e, ha’u apela hanesan Prezidente Komite Orientadór 25 ne’ebé mak hakerek istória luta Timor-Leste nian, atu ita hotu halo reflesaun kle’an, hanoin fila-fali ba kotuk ba sakrifísiu ne’ebé mak ita hotu fó ba iha rai ida-ne’e. Fiar katak, sidadaun hotu iha territóriu lakon nia família ba rai ida-ne’e nia indepedénsia no liberdade. Husu ita atu halo reflesaun kle’an no tau aas nafatin dignidade Estadu ida-nian no fó onra nafatin ba erói no mártir sira, ne’ebé fakar sira-nia raan no ruin, no ikus atu fó onra ba ita-aan rasik,” Nia hateten ba Agência Tatoli liuhusi programa “Entervista Eskluziva” ho tema “Reflesaun komemorasaun Konsulta Populár ba da-25” iha estúdiu Faról, tersa (27 agostu 2024) ne’e.

Nia dehan, ba inan-aman no joven sira-ne’ebé mak partisipa iha konsulta populár 30 agostu 1999 fó sira-nia votu ba ukun rasik-aan atu sente orgullu nafatin, tanba votu ida mak ohin loron halo timoroan livre no independente no sees aan husi okupasaun estranjeiru nian, nune’e halo reflesaun kle’an hodi haree ba futuru ne’ebé mak pozitivu.

Jornalista : Nelson de Sousa

Editór        : Cancio Ximenes   

Publisidade

Leave a Reply

Latest Post

error: Content is protected !!