DILI, 30 agostu 2024 (TATOLI)—Dosente na’in-54 husi Institutu Superiór Cristal (ISC) daudaun ne’e hala’o hela estudu iha nível doutoramentu no baxarelatu iha Portugal, Brazíl no Indonézia.
“Dosente ne’ebé kontinua estudu iha rai-li’ur ne’e iha na’in-sia iha Portugal iha nível doutoramentu, ne’ebé tinan oin ramata ona. Iha Brazíl iha na’in-neen, iha nível doutoramentu ida no na’in-lima ba mestradu. Iha Indonézia ne’e iha 40 kontinua sira-nia estudu iha nível mestradu no doutoramentu,” Reitór ISC, Sebastião Pereira, informa ba Agência Tatoli iha ninia knaar fatin, sesta ne’e.
Dosente ISC ne’ebé kontinua estudu iha Portugal no Brazíl ne’e hetan bolsa estudu husi Fundu Dezenvolvimentu Kapitál Umanu (FDCH, sigla portugés).
“Hirak ne’ebé kontinua estudu iha Indonézia ne’e ami halo kooperasaun ho universidade públiku Indonézia, balun hetan bolsa estudu husi Indonézia no balun ISC rasik mak fó bolsa estudu, ne’ebé hanesan fasilita de’it sira-nia hela fatin no nesesidade kona-ba kursu nian,” nia akresenta.
Notísia relevante : ISC utiliza subvensaun públika ba konstrusaun laboratóriu
Kada tinan nafatin haruka dosente ba kontinua estudu iha rai-li’ur iha área oin-oin.
“Sira kontinua estudu iha área oin-oin hanesan enfermajen, parteira, fakuldade edukasaun nia hanesan matemátika, fízika, kímika, biolojia, sosiolojia, lian portugés no inglés. Ami mós iha planu atu loke tan programa foun maka hanesan programa sosiolojia edukasaun maibé ne’e rekursu umanu tenke haruka ba tuir kursu iha Komunidade País Lian Portugés (CPLP, sigla portugés),” nia informa.
Iha sorin seluk, Diretór Ezekutivu FDCH, Júlio Aparício, hateten, bolseiru sira ne’ebé Governu aloka osan ba sira-nia estudu, bainhira fila tenke kontribui ba Estadu
“Kuandu fila mai ne’e Governu tenke uza iha área oin-oin, tantu iha área edukasaun, enjeñaria, saúde no seluk tan. Ne’e obrigasaun tenke uza tanba bainhira sira bá eskola ne’e hanesan ona funsionáriu Estadu,” Diretór Ezekutivu katak.
Júlio Aparício dehan, kondisaun ne’e la’ós monu de’it iha IX Governu ne’e maibé bainhira iha governasaun tuir mai mós tenke tau-matan ba kolokasaun bolseiru sira ne’ebé uza ona osan Estadu ba halo estudu.
Jornalista : Osória Marques
Editora : Julia Chatarina
