iklan

EDUKASAUN, HEADLINE

ISC utiliza subvensaun públika ba konstrusaun laboratóriu

ISC utiliza subvensaun públika ba konstrusaun laboratóriu

Institutu Superiór Cristal. Imajen/Espesiál

DILI, 28 agostu 2024 (TATOLI)–Institutu Superiór Cristal (ISC) utiliza osan subvensaun públika husi Ministériu Ensinu Superiór, Siénsia no Kultura (MESSK) ba konstrusaun laboratóriu Fakuldade Siénsia Saúde.

“Ministériu iha faze dahuluk transfere 40%, ho totál osan $323.400. Ida-ne’e ita foku liu ba konstrusaun edifísiu laboratóriu ba Fakuldade Siénsia Saúde, ita tau hotu kedas ba konstrusaun tanba konstrusaun ne’e iha prosesu ne’ebé naruk, nia ekipamentu sira presiza hola husi Indonézia no prosesu baze ne’e presiza lori tempu. Tanba ne’e maka orsamentu faze dahuluk ba liu konstrusaun de’it,” Reitór ISC, Sebastião Pereira, hateten, iha ninia knaar fatin, kuarta ne’e.

Hafoin prosesu hotu, responsável iha ISC sei prodús relatóriu kona-ba ezekusaun orsamentu faze dahuluk hodi bele hetan transferénsia restu.

“Bainhira tranfere tan 60% ne’e maka ami hala’o atividade formasaun agregasaun pedagójika nomós formasaun ba lian portugés, ba apoiu estudante, dosente no ba ekipamentu prátika, liu-liu ba departmentu informátika nian, kria liberáriu dijitál no online hodi aumenta estudante sira nia kapasidade nomós livru portugés, inklui halo mós kooperasaun ho universidade sira iha Portugal oinsá ita bele hetan livru para estudante sira bele asesu,” nia akresenta.

Notísia relevante : Projetu konstrusaun sala Laboratóriu Nasionál atinje 95 %

Iha sorin seluk, Ministru Ensinu Superiór Siénsia no Kultura, José Honório da Costa Pereira Gerónimo, hateten, Governu nia inisiativa apoiu subvensaun públika ba ensinu superiór sira ne’e hodi fasilita atividade siea iha universidade, nune’e bele eleva kualidade edukasaun iha Timor-Leste.

“Ita fó apoiu signifika sira mós tenke fó buat ruma ba ita, sira fó buat ruma mak kualidade. Tanba ne’e mak ita apoiu subvensaun ba sira,” Ministru tenik.

Governante ne’e fó hanoin ba ensinu superiór ne’ebé sai benefisiáriu tenke iha responsabilidade atu ezekuta ho didi’ak.

“Faze dahuluk ne’e ita transfere uluk 40%, depois ita iha ekipa téknika sira ne’ebé sei bá tuir atu haree oinsá sira-nia prosesu ba ezekusaun subvensaun ne’ebé Governu fó ba sira, depois ita haree sira-nia progresu hafoin ita transfere tan 60% ba sira,” nia informa.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!