Joven presiza hadomi-respeita ferik no katuas sira
BOBONARO, 30 agostu 2024 (TATOLI)-Iha ámbitu komemorasaun loron istóriku Konsulta Populár 30 agostu ba da-25 ne’ebé realiza iha postu administrativu Bobonaro, nunisípiu Bobonaro, Ministru Justisa, Sérgio Hornai, husu ba joven sira atu hadomi no respeita ferik, katuas no veteranu sira tanba sira mak eroi no autór loloos ba luta ukun rasik-an.
Tuir nia, ho aten-barani ferik-katuas, joven sira uluk nia mak ohin loron Timor-Leste bele konkista independénsia sai hanesan nasaun ida soberanu no independente.
Notísia relevante: Iha 30 agostu 1999 “Milísia-sira ameasa ami, maibé ami lata’uk ba vota nafatin”
“Ha’u husu ba ha’u-nia alin estudante, joven sira favór ida haree ba ita-nia inan-ferik sira, aman ho avo sira tiu sira, tanba sira-nia terus mak ohin ita-boot sira la’o livre loos, sira-nia barani halo ita-boot sira la’o iha forsa liután,” Sergio Hornai, hateten durante halo intervensaun ba serimónia solene iha kampu postu Bobonaro, sesta ne’e.
Alende ne’e estudante sira mós presiza respeitu profesór, maun-alin, feto ho nan no fámilia tomak no restu mortál sira ne’ebé konserva iha osoáriu tanba sira oferese sira-nia vida ba libertasaun pátria.
“Ohin ita-boot sira bele halo lisaun aprendizajen, iha ita-boot sira-nia eskola, hakuak boot ba imi hotu,” nia hateten.
Ministru Justisa lori IX Governu nia naran agradese ba povu hotu ne’ebé partisipa iha festa populár ne’e ho másimu ba da-25.
Nia husu ba jornalista sira, atu transmite informasaun ne’ebé nakonu ho verasidade no loloos atubele fó serteza absoluta ba komunidade no sosiedade hotu.
“Atu sira labele moris iha situasaun ida inserteza, hirak-ne’e hotu liuhosi kontribuisaun, kolaborasaun ita hotu nia, atubele konsolida ita-nia estadu direitu demokrátiku ida-ne’e,” Sergio konklui.
Sekretáriu Autoridade Munisípiu Bobonaro ba Asuntu Administrasaun no Finansa, Domingos da Costa, husu ba veteranu, joven rezistensia, ferik-katuas sira ne’ebé kontribui ba ukun-an atu konta istória ba jerasaun foun sira, nune’e bele banati tuir, tanba joventude agora la hanesan ho joventude ida uluk.
“Problema ida agora mai husi ita-nia joven sira, ita hotu hatene hahú husi suku, mai postu, munisípiu to’o nasionál, ita tuur halo reflesaun ida tanba saida mak sei bele akontese hanesan ne’e,” nia fó hanoin.
Tuir observasaun komemorasaun loron istóriku ne’e hetan partisipasaun no entusiazmu tebes husi komunidade ne’ebé animadu ho atividade tebe kulturál no dahur hamutuk ho Ministru Justisa, Sergio Hornai, ho ekipa no autoridade munisípiu, postu no líder komunitária sira.
Notísia relevante: Konsulta populár 30 agostu 1999 mak determina ukun rasik aan
Jornalista: Sérgio da Cruz
Editór: Evaristo Soares Martins
