Top

Alkatiri hasoru malu ho amigu na’in-rua iha Otél Timor

Sekretáriu-Jerál Partidu FRETILIN, Marí Alkatiri hasoru malu ho Sekretáriu-ONU, António Guterres, iha Otél Timor, sábadu (31/08/2024) Imajen/Espesiál

DILI 31 agostu 2024 (TATOLI)–Sekretáriu-Jerál Partidu Frente Revolucionária do Timor-Leste Independente (FRETILIN), Marí Alkatiri hasoru malu ho Sekretáriu-Jerál Organizasaun Nasaun Unida (ONU), António Guterres no antigu Primeiru-Ministru Portugal, José Manuel Durão Barroso, iha Otél Timor, sábadu ne’e.

“Ha’u mai hanesan halo vizita kortejia no hanesan amigu mós, ne’ebé ohin mai hasoru malu ho amigu na’in-rua, Dorão Barroso, ne’ebé tempu ne’ebá hanesan Ministru Negósiu Estranjeiru no hahú prosesu negosiasaun ho Indonézia, ikus fali mai sai Primeira-Ministru Portugal, ne’ebé kontinua fó apoiu ba ita-nia kauza, depois sai Prezidente ba Komisaun Europeia no kontinua fó apoiu ekonómiku, apoiu institusionál ba ita-nia Estadu Timor-Leste. Segundu enkontru ho Sekretáriu-Jerál ONU, António Guterres, ne’ebé uluk destaka iha partidu sosialista nian, molok sai Primeiru-Ministru ami konsege hasoru malu antes ona,” Alkatiri hateten hafoin hasoru malu.

Notísia relevante : SekJer ONU husu Governu TL presiza garante ba sidadaun hotu hetan moris di’ak

Sekretáriu-Jerál Partidu FRETILIN, Marí Alkatiri dada-lia ho antigu Primeiru-Ministru Portugal, José Manuel Durão Barroso, iha Otél Timor, sábadu (31/08/2024) Imajen/EspesiálNia dehan, hasoru malu ohin hodi ko’alia kona-ba asuntu barak.

“Ha’u hatene Sekretáriu-Jerál ONU mai tanba loron Konsulta Populár 30 agostu, maibé ohin hasoru malu ne’e ami konversa barak, liu-liu situasaun internasionál, maibé kona-ba situasaun Timor-Leste tanba Sekretáriu-Jerál husu situasaun balun, ha’u ko’alia ho ha’u-nia opiniaun, tanba sá mak loron hirak-ne’e ha’u evita bá serimónia públiku,” nia dehan.

Tuir antigu Primeiru-Ministru ne’e, António Guterres sempre atu buka solusaun ba Timor-Leste nia problema, nune’e nia husu importante mak halo enkontru atu intende malu.

“Ha’u dehan bom, ita hotu-hotu ko’alia intendimentu ruma, maibé ha’u evita atu ko’alia problema. Tanba ne’e, ha’u entrega ba istória reál, no aban bainrua istória mak sei deside, sé mak iha razaun no sé mak laiha razaun,” Marí tenik.

Jornalista     : Osória Marques

Editora          : Julia Chatarina

Publisidade

Leave a Reply

Latest Post

error: Content is protected !!