SekJer ONU husu Governu TL presiza garante ba sidadaun hotu hetan moris di’ak
DILI, 30 agostu 2024 (TATOLI) – Sekretariu- Jerál Organizasaun Nasaun Unida (ONU), António Guterres hateten, referendu 30 agostu 1999 hanesan loron gloriozu ba povu Timor-Leste, nune’e Governu Timor-Leste presiza garante atu nia sidadaun hotu hetan moris di’ak.
Lider ONU hato’o lia hirak ne’e iha nia intervensaun bainhira partisipa iha komemorasaun konsulta popular 30 agostu 1999 ba dala-25 iha Estádiu Munisipál Dili, sesta kalan.
“Aniversáriu referendun ba dala 25. Hanesan, loron gloriozu ida ba povu Timor-Leste,” dehan SekJer ONU ne’e.
Notisia relevante:PM Xanana husu timoroan presta omenajen ba Kofi Annan
Tanba Durante tinan 24 nia laran, timoroan barak hasoru sirkunstánsia sira, hasoru ezérsitu ne’ebé maka’as, hasoru bombardeamentu, hasoru distruisaun maibé timoroan sira kontinua reziste to’o hetan vitoria.
Tanba ne’e, ikus iha ona liberdade maske mosu dezafiu barak maibé labele lakon esperansa kontinua hakaat ba oin.
Nia afirma, nasaun nia dezafiu boot mak presiza garante ba nia sidadaun sira kona-ba seguransa alimentár hodi fó moris di’ak ba povu.
“Nasaun nia dezafiu boot liu mak presiza garantia ba nia sidadaun sira seguransa ai-han, saúde ho kualidade no buat seluk tan, no infelizmente, tuir polítika internasionál, seidauk to’o no ha’u hakarak hatene iha ne’e determinasaun Governu Timor-Leste nian atu asegura implementasaun,” António Guterres apela
Iha okaziaun ne’e nia apela ba solidariedade internasionál ne’ebe durante ne’e apoiu Timor-Leste ikus manán funu independensia no agora tenke kontinua apoiu nasaun ne’e hodi manán funu dezenvolvimentu.
“Iha ne’e ha’u hakarak hato’o ha’u-nia admirasaun ho faktu katak, Timor-Leste transforma ba nasaun demokrátiku ida, hetan respeitu kle’an ne’ebé kredível tebes husi komunidade internasionál, beiju ida husi komunidade nasaun luzófona sira,” nia tenik.
Lider ne’e dehan tan, “ha’u iha direitu no ha’u labele ko’alia kona-ba Xanana Gusmão, ba ha’u, nia luta-na’in lendáriu foho nian, iha tempu ne’ebá, hetan mós kastigu iha Prizaun, ha’u respeita nia, nia funu na’in.”
Notisia relevante:António Guterres ho matan-been monu espresa orgullu sai sidadaun Timor-Leste
Jornalista: Hortencio Sanchez
Editór: Florencio Miranda Ximenes
