DILI, 31 agostu 2024 (TATOLI)—Sekretáriu Estadu Negósiu Estranjeiru no Kooperasaun Portugal, Nuno Sampaio, hateten, Governu Portugal komprometidu kontinua apoiu dezenvolvimentu formasaun ba jornalista sira.
“Ita kolabora hela ho projetu Konsultór Lian Potugés ba jornalista timoroan sira. Nune’e, Governu Portugal sei kontinua projetu ida-ne’e iha futuru,” Sekretáriu Estadu informa ba Agência Tatoli, iha Embaixada Portugal, sábadu ne’e.
Notísia relevante : Profesór 6.491 ramata ona formasaun liuhusi projetu Pro-Portugés
Tuir governante ne’e, prezensa lian portugés importante tebes iha mídia, iha tempu ne’ebé ema barak hanoin kona-ba papél mídia nian, ho direitu sosiál no buat hotu ne’ebé sosiedade ida-ne’e hafolin.
“Notísia sira presiza iha kualidade, entaun presiza iha kapasidade atu iha interligasaun entre sosiedade no saida mak mídia sira filtra. Ba ha’u, komunikasaun sosiál no liberdade imprensa nu’udar pilár fundamentál demokrasia nian,” nia akresenta.
Biban ne’e, Nuno Sampaio deklara katak Portugal sei kontinua fó apoiu ba formasaun jornalista sira iha Timor-Leste.
Formasaun iha lian portugés atu promove lian ne’e no iha parte seluk, sei kontribui di’ak ba demokrasia tanba jornalizmu importante tebes ba sosiedade.
Jornalista : Osória Marques
Editora : Julia Chatarina
