DILI, 31 agostu 2024 (TATOLI)–Primeiru-Ministru (PM), Kay Rala Xanana Gusmão, sábadu ne’e, hala’o enkontru ho Produtór sinema, R. Ian White, ne’ebé iha biban ne’e hato’o intensaun atu prodús tan filme kona-ba estória Timor.
“Ha’u iha planu atu halo filme kona-ba istória no luta Timor-Leste nian durante tinan 25 nia-laran. Objetivu halo filme ne’e hodi sai nu’udar istória ba jerasaun Timor-Leste iha futuru, nune’e sira bele hatene luta Timor-Leste nian durante tinan 25,” Ian White relata hafoin hasoru PM Xanana, iha Palásiu Governu, sábadu ne’e.
Notísia relevante : CNC lansa filme Hatutan Memória Sobrevivente iha Covalima
Ian White antes ne’e sai ona produtór ba filme ho durasaun oras 1 minutu 23, kona-ba Timor ho títulu ‘Dalan ba Dame’ ka ‘Road to Peace’, iha tinan-2005, ne’ebé produsaun filme ne’e bazeia ba pedidu espesiál husi Comissao de Acolhimento, Verdade e Reconciliação (CAVR).
Nune’e, Ian White dehan, nia parte sei esforsu hodi serbisu ho Governu no populasaun Timor-Leate hodi halo filme ne’e.
“Ha’u hela iha Austrália, maibé ha’u iha istória ho Timór kleur oituan. Ha’u-nia kompañia I-witness, ninia misaun mak halo filme. Ne’ebé produsaun filme ne’e sei serbisu hamutuk ho kompañia australianu, Governu no populasaun Timor-Leste,” nia tenik.
Produsaun filme ne’e durante tinan-rua no sei entrevista líder nasaun to’o populasaun baibain.
Iha biban hanesan, Produtór sinema ne’e sente kontente tanba bele filafali mai Timor no louva ho dezenvolvimentu.
“Ha’u haree dezenvolvimentu Timor estraordináriu tebes,” nia tenik.
Ian White haktuir, iha tinan 25 liubá, Timor iha situasaun difísil tebes.
“Maibé agora iha mudansa boot, tantu mudansa iha área infraestrutura no ekonomia, kestaun seguransa Timor-Leste moris iha dame. Nasaun barak ita bele dehan pos-konflitu no difísil atu dezenvolve lalais hanesan Timor-Leste,” nia tenik.
Jornalista : Osória Marques
Editora : Julia Chatarina
