DILI, 31 agostu 2024 (TATOLI)–Ministru Negósiu Estranjeiru no Kooperasaun, Bendito Freitas no Sekretáriu Estadu Negósiu Estranjeiru no Kooperasaun Portugal, Nuno Sampaio, sábadu ne’e, hasoru malu hodi diskute kooperasaun bilaterál.
“Ohin Sekretáriu Estadu no ha’u atu reforsa liután kooperasaun bilaterál entre Timor-Leste ho Portugal iha área hotu-hotu, liu-liu ba área justisa, defeza seguransa, edukasaun, agrikultura, saúde no teknolojia,” Ministru relata hafoin enkontru iha salaun Ministériu Negósiu Estranjeiru no Kooperasaun (MNEK), Praia dos Coqueiros, sábadu ne’e.
Ministru konsidera kooperasaun ne’e importante tanba Portugal ho nia prontidaun no disponibilidade tomak halo kooperasaun ho Timor desde uluk no kontinua ba oin.
“Tanba ne’e, hanesan ita-nia domin no ita mós deve ba relasaun espesiál. Ida-ne’e mak ita-nia fuan liu-liu ba jerasaun foun sira katak ida-ne’e mak ita luta ba testemuña únika tebes,” Bendito Freitas, reforsa.
Notísia relevante : PR Horta halo vizita Estadu bá Portugál hodi hametin kooperasaun bilaterál
Tanba ne’e, Timor-Leste no Portugal hamutuk ba batalla dezenvolvimentu hodi bele fó satisfasaun ba bein estar povu nian.
Aleinde ne’e, delegasaun husi Portugal ne’e hato’o mós votu parabéns ba selebrasaun tinan-25 Konsulta Populár (30 agostu 1999) ba Estadu no povu Timor-Leste.
“Sekretáriu Estadu Negósiu Estranjeiru no Kooperasaun Portugal, Nuno Sampaio ho nia ekipa boot husi Portugal manifesta solidariedade ba selebrasaun tinan-25 Konsulta Populár ne’e. Ida-ne’e hanesan faktu istóriku ba ita-nia ligasaun iha longu prazu ne’ebé ohin loron sai país ida independente,” governante ne’e hateten.
Iha biban hanesan, Sekretáriu Estadu Negósiu Estranjeiru no Kooperasaun Portugal, Nuno Sampaio, hateten, enkontru ne’e ko’oalia kona-ba kooperasaun bilaterál no multilaterál.
“Liu-liu kooperasaun rai rua ne’ebé mak di’ak tebes durante ne’e. Tanba ne’e, ho governasaun foun nasaun rua ne’e bele diskute filafali planu estratéjiku sira hodi koopera di’ak liután iha área sira hanesan edukasaun, ensinu portugés, justisa no área foun seluk hanesan ekonomia azul no seluk tan,” Sekretáriu Estadu Nuno Sampaio, tenik.
Jornalista : Osória Marques
Editora : Julia Chatarina
