APORTIL, I.P prevee $786.000 ba manutensaun ró Berlin Nakroma

DILI, 02 setembru 2024 (TATOLI)—Autoridade Portuáriu Timor-Leste, Institutu Públiku (APORTIL, I.P) prevee ona orsamentu ho montante $786.000 hodi halo manutensaun ba ró Berlin Nakroma, iha fulan-outubru tinan ne’e, iha Surabaya-Indonézia.

“Ita tau osan ho montante boot nune’e bainhira halo manutensaun bazeia ba sasán ne’ebé sobu sei tau nafatin, ita sei sura no tau mesin foun mós sei sura tanba tékniku sira sei akompaña. Tuir kontratu husi PT, Dewa Ruci Agung manutensaun ba ró ne’e durante fulan-rua, hahú husi outubru to’o novembru, dezembru tenke mai ona,”Tékniku Vogál I, Júlio Saldanha Barreto, informa iha Portu Dili, segunda ne’e.

Ró ne’e iha mákina tuir rekezitu sistema numerasaun ne’ebé halo husi organizasaun internasionál Marrítima (IMO, sigla inglés) ne’e rua hanaran main engine, iha ida mak hetan fallansu.

Tanba ne’e, ekipa téknika foti hotu dadus hodi halo aprosimasaun ho PT, Dewa Ruci Agung sira nia tékniku to’o iha semana kotuk no horiseik 01 setembru hahú sobu ona mákina referidu molok halo manutensaun iha Surabaya.

“Tuir akordu, tékniku sira ne’e hadi’a mákina durante loron-10 ka kuaze semana rua, hotu mak sei halo teste husi Dili bá Ataúro hodi haree di’ak ona sei ba halo manutensaun boot iha docking Surabaya,” nia akresenta.

Notísia relevante : APORTIL, I.P deside ró-ahi Berlin Nakroma la halo operasaun provizóriamente

Bainhira ró Berlin Nakroma ne’e ba halo manutensaun iha Surabaya sei hetan akompaña mentu husi funsionáriu tékniku sira husi APORTIL, I.P no empreza Dewa Ruci Agung rasik mak mai sei lori.

Iha fatin hanesan, Diretór Kabutajen, Rolando Xavier, hateten, ekipa téknika haree hotu tau lista docking.

“Ita kontaktu na’in ba PT, Dewa Ruci Agung docking nian iha Surabaya hodi haruka tékniku sira mai to’o iha 31 agostu no 01 setembru sira hahú sobu ona mákina sira,” nia tenik.

Jornalista     : Arminda Fonseca

Editora          : Julia Chatarina