DILI, 23 maiu 2023 (TATOLI)—Autoridade Portuáriu Timor-Leste, Institutu Públiku (APORTIL, I.P) deside ró-ahi Berlin Nakroma la halo operasaun provizóriamente hanesan baibain tanba kondisaun mákina ladi’ak.
“Ami foin lalais fó sai públikasaun kona-ba ró-ahi Berlin Nakroma labele halo operasaun hanesan baibain tanba nia kondisaun mákina hanesan ramp door ladi’ak, tanba kuaze tinan-rua la halo operasaun,” Prezidente APORTIL, I.P, José Oliveira Leong, informa ba Agência Tatoli, iha Suai Room, Timor Plaza, kinta ne’e.
Tanba haree ba kondisaun ro-ahi ne’e maka APORTIL, I.P foti desizaun ne’e tanba tau prioridade ba pasajeiru nia seguransa.
Notísia relevante : Ró-ahi Berlin Nakroma la halo operasaun durante semana ida ona
Ekipa husi APORTIL, I.P sei bá uluk Surabaya, Indonézia, iha fulan-juñu tinan ne’e hodi haree fatin manutensaun hotu no bainhira mai fali maka loke konkursu públiku hodi halo manutensaun.
“Ita tenta halo esforsu nune’e iha juñu nia rohan ró tenke bá ona, tanba ró nia kondisaun ladi’ak, kona-ba orsamentu, ekipa sei halo hela chek list ka verifikasaun didi’ak ba kustu kondisaun ró nian mak foin ita bele hatene no prevee orsamentu,” nia akresenta.
Nune’e, ró-ahi Success sei asegura konetividade ho rota Dili-Atauro bá-mai iha sábadu kada semana hanesan baibain.
Ro-ahi Berlin Nakroma nia ramp door antes ne’e hetan estragu tanba laloran tasi boot iha fulan-janeiru 2024, ne’ebé maski hanesan parte kiik ida husi ro-ahi ne’e maibé la fó seguru ba pasajeiru no sasán nia movimentu nune’e hein manutensaun mak halo operasaun.
APORTIL, I.P tinan ne’e prevee orsamentu $800.000 ba manutensaun ro-ahi Berlin Nakroma no Berlin Ramelau. Ró-ahi rua ne’e, halo manutensaun iha rai-li’ur tanba laiha estalleiru adekuadu iha rai-laran.
Enkuantu, kona-ba kombustível ba ró-ahi rua ne’e rasik kada tinan prevee orsamentu millaun $1 hodi asegura konektividade ho rota Dili-Oé-cusse no Dili-Ataúro, ne’ebé ró-ahi rua nesesita kombustível tonelada 40 kada fulan.
Jornalista : Arminda Fonseca
Editora : Julia Chatarina
