DILI, 02 setembru 2024 (TATOLI)–Prezidente Autoridade (PA) munisipiu Ainaro, Manuela Georgina Carmo Bucar Cortereal, hateten nia parte koordena ona ho padre parokia sira hodi prepara transporte sira hodi bele tula sarani sira ba Dili hodi partisipa misa solene ne’ebé Papa Francisco prezide iha Tasi-Tolu iha 10 setembru 2024.
Nia hateten, sarani no ministru estraordináriu iha Ainaro hamutuk 9.000 mak sei hahú hala’o viajen husi Ainaro ba Dili, iha loron 07 to’o 09 setembru 2024.
“Ami-nia fatin konsentrasaun mak iha Hudi Laran, iha rai luan boot ida iha ne’ebá, ita mak utiliza iha ne’ebá. Ita-nia sarani sira-ne’e sei sei partisipa misa solene, tuir regra no oráriu ne’ebé komisaun organizadora nasionál estebelese,” nia hateten ba Agência Tatoli liuhusi telefónika, segunda ne’e.
Manuela Georgina Carmo Bukar Cortereal hateten, Governu aloka osan rihun $40 ba kada munisípiu atu bele fó apoiu ba sarani sira-ne’ebé laiha kapasidade finanseira hodi ba tuir misa, no alokasaun oesamentu ne’e ba iha kada parokia, tuir dadus númeru sarani sira-nian ne’ebé rejistradu ona.
“Autoridade munisipiu Ainaro koordena ho amu pároku sira iha postu haat hanesan Ainaro, Maubisse, Fatubeliku no Hatudo no administradór postu sira. Subsidiu Governu fó munisípiu Ainaro ne’e diretamente transfere ba sira, tanba sira mak identifika no organiza sarani sira iha sira-nia transporte. Sira organiza oinsa atu fasilita peregrinu sira ba iha Dili,” nia dehan.
Prezidente ne’e esplika, sarani sira balun ne’ebé ba ho sira-nia transporte privadu no autoridade munisipál ajuda mak enxe ba transporte públiku hodi tula peregrinu sira ba Dili.
Iha sorin seluk, Prezidente Autoridade (PA) munisipiu Aileu, João Bosco dos Santos, hateten sarani sira hamutuk 7.500 mak sei mai tuir misa Amu Papa nian iha Tasi-Tolu.
Autoridade munisipál ne’e hateten, iha preparasaun transporte hamutuk 50 no postu administrativu sira iha mós transporte ualu (8) no sia (9) ne’ebé bele transporta kristaun sira.
“Parokia hotu-hotu sei konsentra iha Sarlala, depois ita ba hamutuk. Ita-nia fatin preparadu ona iha Kasnafar ba iha konsentra iha ne’ebá. Iha ema barak, maibé transporte ne’e sei tula uluk ba,” João Bosco dos Santos hateten.
Nia hateten, ida-ne’e iha koordenasaun entre Polísia Nasionál Timor-Leste (PNTL), pároku sira no autoridade sira hotu.
Jornalista : Jesuína Xavier
Editór : Cancio Ximenes
