DILI, 02 setembru 2024 (TATOLI)–Timoroan na’in-hitu desloka aban bá Indonézia hodi kontinua estudu ba nível lisensiatura, iha Universidade Muria Kudus, iha Semarang-Indonézia.
“Indonézia mak oferese bolsa sira ne’e mai Timor-Leste no sira na’in-hitu mak hetan oportunidade bá kontinua estudu iha ne’ebá. Sira bá foti área edukasaun no tékniku informátika. Sira sei hala’o estudu ho durasaun tinan-haat iha Universidade Muria Kudus Semarang. Orsamentu ne’e tanba ita hamutuk ho Indonézia, entaun Indonézia sira mak fó bolsa tomak ba bolseiru sira-ne’e,” Sekretáriu Estadu Ensinu Sekundária-Jerál no Tékniku Vokasionál, Domingos Lopes Lemos, hateten, hafoin hasoru malu ho bolseiru sira, iha salaun Ministériu Edukasaun (ME), Vila-Verde, segunda ne’e.
Notísia relevante : FDCH prevee $270.600 ba bolseiru 66 kontinua estudu iha Xina
Nia konsidera, bolsa estudu ne’e nu’udar oportunidade, tanba ne’e nia husu ba bolseiru sira atu estuda didi’ak no ramata tuir tinan akadémiku ne’ebé iha, nune’e bainhira fila mai Timor ho susesu hodi halo netik buat ruma ba nasaun.
Iha sorin seluk, Prezidente Komisaun G ne’ebé trata asuntu Edukasaun, Juventude, Kultura no Sidadania iha Parlamentu Nasionál, Deputadu Armando dos Santos Lopes, husu ba bolseiru timoroan sira ne’ebé kontinua estudu iha rai-li’ur ne’e atu aproveita oportunidade ho di’ak.
“Momentu sira hanesan ne’e di’ak tebes, tanba bele iha oportunidade di’ak ba timoroan sira atu kontinua estudu iha rai-li’ur. Mensajen ba ita-nia estudante ne’ebé mak atu bá kontinua iha Indonézia ne’e bainhira to’o iha Indonézia estuda didi’ak, fila mai ho diploma, maibé mais melhor aleinde ne’e diploma ne’e mak kualidade, tanba futuru nasaun Timor-Leste nia ne’e ba ema ne’ebé kakutak badaen ho kualidade atu kaer nasaun ida-ne’e ba oin,” nia fó hanoin.
Nune’e mós, Bolseiru Martinho Xavier husi Manufahi, agradese ba oportunidade no kompromete kontinua estudu ho di’ak.
“Ha’u sente kontente tanba bele hetan oportunidade ida-ne’e ho bolsa estudu ne’ebé iha ba kontinua estudu iha Indonézia, ha’u hili área tékniku informátika no ha’u sei ba estuda didi’ak, nune’e bainhira fila mai Timor ho susesu hodi halo netik buat ruma ba ita-nia rai,” nia tenik.
Bolseiru Canisia Lemos husi Ermera, sente kontente no agradese ba oportunidade.
“Ha’u sei ba estuda didi’ak. Ha’u sei ba apreende didiak iha área ne’ebé ha’u hili nune’e bainhira mai fali Timor bele implementa fali buat ne’ebé ha’u apreende ona iha Indonézia,” nia katak.
Jornalista : Osória Marques
Editora : Julia Chatarina
