DILI, 03 setembru 2024 (TATOLI)–Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT), tinan ne’e, prodús tan xapa matríkula hamutuk 10.000 ba karreta no motór.
“Kona-ba xapa matríkula orijinál ba karreta no motór iha tinan ne’e empreza xineza Auto Zone mak manán sira halo produsaun iha Timor tau ho orsamentu hamutuk $110.000 no sei halo produsaun ba xapa matríkula hamutuk 10.000, sira halo hotu ona produsaun hein fulan ne’e ka fulan oin sei entrega mai ita atu distribui,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, DNTT, Balide, tersa ne’e.
Notísia relevante : DNTT husu ba motorista sira foti xapa matríkula orijinál
DNTT iha tinan 2022 halo mós akizasaun xapa matríkula orijinál ba karreta 7.000 ho kustu $77.000 no motór 30.000 ho kustu $270.000, ne’ebé distribui ona no balun sei iha.
Xapa matríkula orijinál ne’ebé prodús ona ba karreta kiik hahú B.21-636 TLS, enkuantu karreta boot A.55-605 TL no motór to’o ona X-1089 TL
“Kona-ba blanku livrete iha tinan ne’e ita tau orsamentu hamutuk $56.000-resin, kompañia manan-na’in sira entrega mai Diresaun Nasionál Transporte Terrestre hamutuk 11.263 husi númeru ne’e ita distribui ona ba munisípiu sira hotu agora falta hela 4.000,” nia tenik.
Jornalista : Arminda Fonseca
Editora : Julia Chatarina
