DILI, 03 setembru 2024 (TATOLI)–Ekipa delegasaun nivel altu husi igreja no Governu halo inspesaun ba fatin konsentrasaun hodi halibur sarani sira husi munisipiu Baucau, Lautém, Manatuto, Aileu, Ainaro, Cavalima, Bobonaro, Atauro no Rejiaun Administrativa Espesiál Oé-Cusse.
Vise-Ministru Administrasaun Estatal (MAE), Jacinto Rigoberto de Deus, hateten ekipa konjunta husi Governu no igreja hala’o inspesaun ba fatin ba sarani sira halo akampamentu, tanba ne’e ohin dader husi Hera fatin tolu ne’ebé deside ba sarani sira husi Baucau, Lautém no Viqueque.
“Kondisaun ba preparasaun sira-ne’e seidauk másimu, tanba sei atinje 80%, tan ne’e ekipa sujere atu kompaniã no Ajensia Dezenvolvimentu Nasionál atu aselera ninia preparasaun liuliu instalasaun bee no ahi,” Vise-Ministru Administrasaun Estatal (MAE), Jacinto Rigoberto de Deus, hatetn ba Agência Tatoli, iha Manleuana.
Fatin konsentrasaun iha ADN nia kotuk iha Fatuhada ne’e, deiside ba sarani sira husi Ainaro Aileu nia konsentra fatin no iha Maneleu iha veteranus nia fatin ne’e sei prepara ba sarani sira husi Manufahu mak sei hela.
“Husi fatin sira-ne’ebé mak ami ba haree, kondisaun ne’ebé mak ami haree atu besik 100%, tanba kondisaun iha nanis ona mak iha veteranus nia fatin ne’e,” nia dehan.
Ba sarani sira husi munisipiu Manatuto, Governu sei prepara fatin konsentrasaun iha Timor Plaza nia kotuk, entretantu fatin Sentru COVID-19 iha Tasi-Tolu ne’e oferse ba peregrine sira husi NTT-Indonézia hodi hela no fatin Pelican Paradise ne’e sai fatin konsentrasaun ba sarani sira husi RAEOA no Ataúro.
Iha Pelican Paradise nia kotuk sei nakfilak ba fatin konsentrasaun ba sarani sira husi munisipiu Ermera no diresaun ida ba Ermera nian sei veternu nia fatin, sei prepara ba munispiu Covalima no Kaitehu nian ba Munisipiu Bobonaro.
Sarani sira husi munisipiu Liquiça sei konsentra iha Igreja Liquiça nian, depois sei tama dala ida iha 10 Setembru 2024 atu mai tuir misa solene ne’ebé Papa Francisco sei prezide iha Tasi-Tolu.
Husu kona-ba tenda ka lona ba sarani sira, Governante ne’e hateten, ekipa la prepara kondisaun lona no tenda ba sarani sira maibé prepara akomodasaun ba hahan nian.
Tuir nia, sarani sira husi munisipiu sei mai Dili iha loron 08 no 09 Setembru 2024 hodi tuir misa iha Tasi-Tolu.
Iha fatin hanesan, koordenadór lojistika husi igreja nian, Jorge Serrano, hateten fatin akomodasaun ba sarani sira-nian ne’e sei iha Tasi-Tolu iha fatin uluk prepara bas ala emerjensia ba pasiente COVID-19.
“Ita haree fatin sira-ne’ebé prepara ba sarani sira iha rai-laran, ami mobiliza de’it, lojistika ne’e Governu mak prepara no iha orsamentu rasik,” nia dehan.
Jornalista : Jesuína Xavier
Editór : Cancio Ximenes
